ବନ ବିଭାଗ ଦ୍ୱାରା ଲକ୍ଷାଧିକ ଟଙ୍କାର ହାତୀ ଦାନ୍ତ ଜବତ

ବାଲେଶ୍ୱର ଜିଲ୍ଲା ଔପଦା ବନ ବିଭାଗ କର୍ମଚାରୀଙ୍କ ଦ୍ୱାରା ଶନିବାର ବିଳମ୍ୱିତ ରାତିରେ ଲକ୍ଷାଧିକ ଟଙ୍କାର ହାତୀ ଦାନ୍ତ ଜବତ ହୋଇଛି। ଏହି ଅଭିଯୋଗରେ ବନ ବିଭାଗ ପକ୍ଷରୁ ୫ ଜଣଙ୍କୁ ଗିରଫ କରାଯାଇଛି। ସେମାନଙ୍କୁ ଔପଦା ବନ ଭିଭାଗ କାର୍ଯ୍ୟାଳୟରେ ଅଟକ ରଖାଯାଇଛି। ମିଳିଥିବା ସୂଚନା ମୁତାବକ, ସ୍ଥାନୀୟ ଜଙ୍ଗଲରୁ ହାତୀ ମାରି ସେମାନଙ୍କ ଦାନ୍ତ ବିକ୍ରି କରୁଥିବା ଏକ ରାକେଟ ସକ୍ରିୟ ହୋଇଥିବା ବନ ବିଭାଗ ନିକଟରେ ବିଶେଷ ସୂତ୍ରରୁ ଖବର ମିଳିଥିଲା।

ବନ ବିଭାଗର ଏକ ଟିମ ଭଦ୍ରକ ଜିଲ୍ଲା ଆଗରପଡା ଥାନା ଅଧିନ କାଦବରାଙ୍ଗ ଅଂଚଳରେ ଅଚାନକ ଚଢ଼ଉ କରି ହାତୀ ଦାନ୍ତ ସହ ଏହି ୫ ଜଣଙ୍କୁ ଗିରଫ କରିଛି। ତେବେ ଗିରଫ ବ୍ୟକ୍ତିଙ୍କ ନାମ ବନ ବିଭାଗ ପକ୍ଷରୁ ସାର୍ବଜନୀନ କରାଯାଇନି। ଏନେଇ ବିଭାଗୀୟ ଅଧିକାରୀଙ୍କ ସହ ଆଲୋଚନା କରାଯାଇଥିଲା। ସେ କହିଥିଲେ, ଏହି ଘଟଣାର ଏବେବି ତଦନ୍ତ ଚାଲିଛି। ଆହୁରି ବି କିଛି ଲୋକଙ୍କ ସମ୍ପୃକ୍ତି ଥିବା ସନ୍ଧେହ କରାଯାଉଛି। ଏନେଉ ଉଚ୍ଚପଦସ୍ଥ ଅଧିକାରୀଙ୍କୁ ମଧ୍ୟ ଅବଗତ କରାଯାଇଛି। ସେମାନେ କାର୍ଯ୍ୟାଳୟରେ ପହଁଚିବା ପରେ ଏହି ଘଟଣା ସମସ୍ତ ତଥ୍ୟ ଗଣମାଧ୍ୟମଙ୍କୁ ପ୍ରଦାନ କରାଯିବ ବୋଲି କହିଥିଲେ।