ସମ୍ଭାବ୍ୟ ବାତ୍ୟା ପାଇଁ ଚାଷୀମାନଙ୍କୁ ସତର୍କ ସୂଚନା, ୧୧ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି

ଆଣ୍ଡାମାନ ସାଗର ଅଞ୍ଚଳରେ କେନ୍ଦ୍ରୀଭୂତ ଲଘୁଚାପ ଆହୁରି ସକ୍ରିୟ ହେଉଛି। ଏହା କ୍ରମଶଃ ପଶ୍ଚିମ ଉତ୍ତର ପଶ୍ଚିମ ଦିଗରେ ଗତି କରି ଆସନ୍ତାକାଲି ଡିପ୍ରେସନର ରୂପ ନେବ। ଉତ୍ତର ଆନ୍ଧ୍ର ଓ ଓଡିଶା ଉପକୂଳରେ ପହଞ୍ଚିବ । ୩ ଡିସେମ୍ବରରେ ପ୍ରବଳ ବର୍ଷା। ପୁରୀ, ଗଜପତି, ଜଗତସିଂହପୁର ଓ ଗଞ୍ଜାମ ଏହି ୪ ଟି ଜ଼ିଲ୍ଲାରେ ପ୍ରବଳ ବର୍ଷା ସମ୍ଭାବନା ରହିଛି । ୧୧ ଜ଼ିଲ୍ଲାକୁ ୟେଲୋ ୱର୍ଣ୍ଣିଙ୍ଗ ଜାରି କରିଛି ପାଣିପାଗ ବିଭାଗ। ଚାଷୀମାନଙ୍କ ପାଇଁ ସତର୍କ ସୂଚନା ଜାରି କରାଯାଇଛି । ନାଳୀକାଟି କ୍ଷେତରୁ ଜଳ ନିଷ୍କାସନ କରିବାକୁ ଚାଷୀଙ୍କୁ ପରାମର୍ଶ ଦିଆଯାଇଛି । ୨ ତାରିଖ ସୁଦ୍ଧା ପାଚିଲା ଫସଲ ଘରକୁ ନେବା ପାଇଁ କୁହାଯାଇଛି । ଗୃହ ପାଳିତ ପଶୁଙ୍କୁ ବାହାରକୁ ଛାଡ଼ନ୍ତୁ ନାହିଁ । ଜଳବନ୍ଦୀ ସମସ୍ୟା ଉପୁଜିପାରେ । କଚାରାସ୍ତା ମାଟି ଘର କାନ୍ଥ ପଡ଼ିବା ନେଇ ସତର୍କ କରାଯାଇଛି ।

rain

ପାହାଡିଆ ଅଞ୍ଚଳରେ ଭୂସ୍ଖଳନ ସମ୍ଭାବନା ରହିଛି । ୫୦ରୁ ୬୦ କିମି ବେଗରେ ପବନ ବୋହିବ । ୨ ତାରିଖରୁ ସମୁଦ୍ରକୁ ଯିବାକୁ ବାରଣ କରାଯାଇଛି । ଝଟକା ପବନ ୯୦, ୧୦୦ ଓ ୧୧୦ କିମି ଯାଏଁ ବହିବାର ସମ୍ଭାବନା ରହୁଛି । ସମୁଦ୍ର ଅତ୍ୟଧିକ ଅଶାନ୍ତ ରହିବ । ଉପକୂଳ ଅଞ୍ଚଳରେ ୩ ଡିସେମ୍ବରରୁ ପ୍ରଭାବ ପଡ଼ିବ । ବାତ୍ୟା ସୃଷ୍ଟି ହୋଇନି ତେଣୁ ଏହାର ନାମକରଣ ହୋଇନି ବୋଲି ପାଣିପାଗ ବୈଜ୍ଞାନିକ ଉମାଶଙ୍କର ଦାସ ସୂଚନା ଦେଇଛନ୍ତି । ବାତ୍ୟାକୁ ଦୃଷ୍ଟିରେ ରଖି ଉଚ୍ଚସ୍ତରୀୟ ବୈଠକ କରାଯାଇଛି । ବାତ୍ୟା ଆଶ୍ରୟ ସ୍ଥଳୀ ପ୍ରସ୍ତୁତ ରଖିବାକୁ ଏଥିରେ ନିର୍ଦ୍ଦେଶ ଦିଆଯାଇଛି । ତଳିଆ ଅଞ୍ଚଳ ଲୋକଙ୍କୁ ଆବଶ୍ୟକତା ଦେଖି ସ୍ଥାନାନ୍ତରିତ କରିବାକୁ କୁହାଯାଇଛି । ଫାୟାର, ଓଡ୍ରାଫ, ଏନଡ଼ିଆରଏଫକୁ ସଜାଗ ରଖିବାକୁ ନିର୍ଦ୍ଦେଶକ ମାନଙ୍କୁ ଅବଗତ କରାଯାଇଛି । ୨ ଶହଟି ଫାୟାର ଟିମକୁ ପ୍ରସ୍ତୁତ କରିବାକୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି । ଏଥି ସହିତ ଉପକୂଳ ସହିତ ନୟାଗଡ଼ ଓ ମୟୁରଭଞ୍ଜ ଜିଲ୍ଲାକୁ ଆଲର୍ଟ ରହିବାକୁ ଏହି ବୈଠକରେ କୁହାଯାଇଛି ।