ପାରାଦୀପ: ସମୁଦ୍ରୀୟ ମାଛମାନଙ୍କ ଅଣ୍ଡାଦାନ ଋତୁ ଆରମ୍ଭ ହୋଇଥିବା ପରିପ୍ରେକ୍ଷିତରେ ପାରାଦୀପ ସହ ଓଡ଼ିଶା ଉପକୂଳ ଅଞ୍ଚଳରେ ମାଛଧରା ଉପରେ କଟକଣା ଜାରି କରାଯାଇଛି। ପାରାଦୀପ ସାମୁଦ୍ରିକ ମତ୍ସ୍ୟ ବିଭାଗ ପକ୍ଷରୁ ଏହି ନିଷେଧାଜ୍ଞା ଏପ୍ରିଲ ୧୫ ତାରିଖରୁ ଜୁନ୍ ୧୪ ପର୍ଯ୍ୟନ୍ତ କଢ଼ାଯିବ ବୋଲି ସୂଚନା ମିଳିଛି।
ଏହି ସମୟସୀମା ମଧ୍ୟରେ ସମସ୍ତ ଯନ୍ତ୍ରଚାଳିତ ଡଙ୍ଗା ଓ ଟ୍ରଲରମାନଙ୍କୁ ସମୁଦ୍ରକୁ ଯାଇ ମାଛ ଧରିବା ଉପରେ ସଂପୂର୍ଣ୍ଣ ରୋକ୍ ଲଗାଯାଇଛି। ମତ୍ସ୍ୟ ନିର୍ଦ୍ଦେଶାଳୟ, କଟକ ପକ୍ଷରୁ ଏନେଇ ସ୍ପଷ୍ଟ ନିର୍ଦ୍ଦେଶନାମା ଜାରି ହୋଇଛି।
ମାଛମାନଙ୍କ ପ୍ରଜନନ ସମୟରେ ଅଣ୍ଡା ଓ ଛୋଟ ମାଛ ନଷ୍ଟ ହେବାର ଆଶଙ୍କା ଥିବାରୁ ଏହି ପଦକ୍ଷେପ ଗ୍ରହଣ କରାଯାଇଛି। ଓଡ଼ିଶା ସାମୁଦ୍ରିକ ଫିସିଂ ରେଗୁଲେସନ୍ ଆକ୍ଟ ୧୯୮୨ ଅନୁଯାୟୀ ଏହି ନିଷେଧକୁ କଡ଼ାଭାବରେ ଲାଗୁ କରାଯିବ।
ଏହି କଟକଣାର ପ୍ରଭାବ ପାରାଦୀପ ଅଞ୍ଚଳର ପ୍ରାୟ ୫୦ ହଜାର ମତ୍ସ୍ୟଜୀବୀଙ୍କ ଜୀବିକା ଉପରେ ପଡ଼ିବା ସ୍ପଷ୍ଟ। ତଥାପି, ଛୋଟ ଡଙ୍ଗା (୮.୫ ମିଟର ପର୍ଯ୍ୟନ୍ତ) କୁ ସୀମିତ ଅଞ୍ଚଳରେ ମାଛ ଧରିବା ପାଇଁ ଅନୁମତି ମିଳିଥିବାରୁ କିଛି ମାତ୍ରାରେ ରାହାତ ମିଳିବ।
ମତ୍ସ୍ୟ ବିଭାଗ ପକ୍ଷରୁ ମତ୍ସ୍ୟଜୀବୀମାନଙ୍କୁ ନିୟମକୁ କଡ଼ାଭାବରେ ପାଳନ କରିବାକୁ ଅନୁରୋଧ କରାଯାଇଛି, ଯାହା ଆଗାମୀ ଦିନରେ ମାଛ ଉତ୍ପାଦନକୁ ସୁସ୍ଥ ଓ ସ୍ଥିର ରଖିବାରେ ସହାୟକ ହେବ।
