ଅବୈଧ ନିଶାଦ୍ରବ୍ୟ ବ୍ୟବସାୟ ବିରୋଧରେ ପୋଲିସ୍ର ବଡ଼ କାର୍ଯ୍ୟାନୁଷ୍ଠାନ। ସଦର ଥାନା ଅଞ୍ଚଳରେ ଚାଲିଥିବା ଏକ ଗୁପ୍ତ ସୂଚନା ଆଧାରରେ ପୋଲିସ୍ ଚଢ଼ାଉ କରି ୯୬୦ ବୋତଲ ଅବୈଧ କଫ୍ ସିରପ୍ ଜବତ କରିଥିବା ସହ ୭ ଜଣକୁ ଗିରଫ କରିଛି।
ଗୁରୁବାର ଦିନ ଅପରାହ୍ନ ୧ଟା ସମୟରେ ବେହେରା ଛକ ନିକଟସ୍ଥ ଏକ ଫୁଟବଲ୍ ମାଇଦାନରେ ପୋଲିସ୍ ଟିମ୍ ଚଢ଼ାଉ କରିଥିଲା। ସେଠାରେ ଅଭିଯୁକ୍ତମାନେ ଅବୈଧ ଭାବେ ‘ୱିନ୍ରେକ୍ସ’ କଫ୍ ସିରପ୍ ବ୍ୟବସାୟରେ ଲିପ୍ତ ଥିବା ଧରାପଡ଼ିଥିଲେ। ଏହି ସିରପ୍କୁ ନିଶା ପାଇଁ ଦୁରୁପଯୋଗ କରାଯାଉଥିବାରୁ ଏହା ନିୟନ୍ତ୍ରିତ ଶ୍ରେଣୀରେ ପଡ଼େ।
ଚଢ଼ାଉ ସମୟରେ ପୋଲିସ୍ ୯୬୦ ବୋତଲ କଫ୍ ସିରାପ୍ ସହ ୨.୬ ଲକ୍ଷ ଟଙ୍କା ନଗଦ ଜବତ କରିଛି। ଏହାସହ ଅଭିଯୁକ୍ତମାନେ ବ୍ୟବହାର କରୁଥିବା ୬ଟି ଚାରିଚକିଆ ଗାଡ଼ି, ୨ଟି ମୋଟରସାଇକେଲ୍, ଗୋଟିଏ ସ୍କୁଟର ଓ ୧୨ଟି ମୋବାଇଲ୍ ଫୋନ୍ ମଧ୍ୟ ଜବତ ହୋଇଛି।
ଗିରଫ ଅଭିଯୁକ୍ତମାନେ ବରଗଡ଼ ଜିଲ୍ଲାର ବିଭିନ୍ନ ଅଞ୍ଚଳର ହେବା ସୂଚନା ମିଳିଛି। ସମସ୍ତଙ୍କୁ ଗିରଫ କରି ନିଶାଦ୍ରବ୍ୟ ଓ ମନୋପ୍ରଭାବୀ ପଦାର୍ଥ ଆଇନ ଅନୁଯାୟୀ ମାମଲା ରୁଜୁ କରାଯାଇଛି।
ପୋଲିସ୍ କହିଛି ଯେ, ସମସ୍ତ ଜବତ ପ୍ରକ୍ରିୟା ସାକ୍ଷୀ ଓ ଏକ୍ସିକ୍ୟୁଟିଭ୍ ମ୍ୟାଜିଷ୍ଟ୍ରେଟ୍ଙ୍କ ଉପସ୍ଥିତିରେ କରାଯାଇଛି। ଏହି ଚକ୍ରର ପଛରେ ଆଉ କେହି ଜଡିତ ଅଛନ୍ତି କି ନାହିଁ, ତାହା ନେଇ ଅଧିକ ତଦନ୍ତ ଚାଲିଛି।
