ନୂଆଦିଲ୍ଲୀ: ଅରବିନ୍ଦ କେଜ୍ରିଓ୍ବାଲ ଓ ମନୀଷ ସିସୋଦିଆ ଆଜି ରାଜଘାଟରେ ପହଞ୍ଚି ମହାତ୍ମା ଗାନ୍ଧୀଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ବିରୋଧୀ ଦଳ ନେତା ଆତିଶୀ ମଧ୍ୟ ସେମାନଙ୍କ ସହ ଉପସ୍ଥିତ ଥିଲେ। ଏହି ଘଟଣା ରାଜନୈତିକ ମଞ୍ଚରେ ନୂଆ ଚର୍ଚ୍ଚାର ସୃଷ୍ଟି କରିଛି।
ଏହାପୂର୍ବରୁ, କେଜ୍ରିଓ୍ବାଲ ଓ ସିସୋଦିଆ ଜଷ୍ଟିସ ସ୍ୱର୍ଣ୍ଣକାନ୍ତ ଶର୍ମାଙ୍କୁ ଚାରି ପୃଷ୍ଠାର ଏକ ବିସ୍ତୃତ ଚିଠି ଲେଖି କୋର୍ଟରେ ବ୍ୟକ୍ତିଗତ ଭାବେ କିମ୍ବା ତାଙ୍କ ଓକିଲ ମାଧ୍ୟମରେ ହାଜର ନ ହେବାର ନିଷ୍ପତ୍ତି ଜଣାଇଥିଲେ। ସେମାନେ ଏହି ପଦକ୍ଷେପକୁ “ସତ୍ୟାଗ୍ରହ” ବୋଲି ବର୍ଣ୍ଣନା କରିଛନ୍ତି। ସେମାନଙ୍କ କହିବା ଅନୁସାରେ, ଏହା ଏକ ସାଧାରଣ ଆଇନଗତ ପଦକ୍ଷେପ ନୁହେଁ, ବରଂ ନୈତିକ ଓ ସିଦ୍ଧାନ୍ତଗତ ଭିତ୍ତିରେ ନିଆଯାଇଥିବା ଏକ ନିଷ୍ପତ୍ତି।
ଅରବିନ୍ଦ କେଜ୍ରିଓ୍ବାଲ କହିଛନ୍ତି ଯେ, “ଆମେ ଦେଶର ନ୍ୟାୟିକ ବ୍ୟବସ୍ଥାକୁ ଅତ୍ୟନ୍ତ ସମ୍ମାନ କରୁଛୁ। ଆଜି ଆମେ ଯାହା କିଛି ମୁକ୍ତ ଅଛୁ, ସେଥିରେ ନ୍ୟାୟପାଳିକାର ଭୂମିକା ଅସ୍ୱୀକାର୍ଯ୍ୟ ନୁହେଁ। କିନ୍ତୁ ଏପରି ପରିସ୍ଥିତି ଗଠିତ ହୋଇଛି ଯାହା ଆମକୁ ଏହି ସତ୍ୟାଗ୍ରହ ମାର୍ଗକୁ ବାଛିବାକୁ ବାଧ୍ୟ କରିଛି।” ସେ ଆହୁରି କହିଛନ୍ତି ଯେ ଚିଠିରେ ସମସ୍ତ ଘଟଣାକ୍ରମ ଓ ତାଙ୍କ ମତାମତ ବିସ୍ତାରିତ ଭାବରେ ଲେଖାଯାଇଛି।
ସେହିପରି, ସେ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ ନିଜ ବିବେକର ସ୍ୱର ଅନୁସରଣ କରି ସେ ଏହି ନିଷ୍ପତ୍ତି ନେଇଛନ୍ତି ଏବଂ ଏହାର ସମ୍ଭାବ୍ୟ ଆଇନଗତ ପରିଣାମ ଭୋଗିବାକୁ ସେ ପୂର୍ଣ୍ଣ ପ୍ରସ୍ତୁତ। “ଏହା ମୋର ଆଇନଗତ ସ୍ୱାର୍ଥକୁ କ୍ଷତି ପହଞ୍ଚାଇପାରେ, କିନ୍ତୁ ମୁଁ ସେଥିପାଇଁ ପ୍ରସ୍ତୁତ,” ବୋଲି ସେ କହିଛନ୍ତି।
ଏହି ପଦକ୍ଷେପକୁ ରାଜନୈତିକ ଓ ଆଇନଗତ ମଞ୍ଚରେ ବିଭିନ୍ନ ମତ ମିଳୁଥିବା ବେଳେ, ଆଗାମୀ ଦିନରେ ଏହାର ପ୍ରଭାବ କେମିତି ପଡ଼ିବ ସେଥିପାଇଁ ସମସ୍ତଙ୍କ ଦୃଷ୍ଟି ରହିଛି।
