ଅଯୋଧ୍ୟାରେ ଜଳିବ ୩୦ ଲକ୍ଷ ଦୀପ, ଦୀପୋତ୍ସବ ପାଇଁ ଜୋରଦାର ପ୍ରସ୍ତୁତି
ଅଯୋଧ୍ୟା: ଭଗବାନ ଶ୍ରୀରାମଙ୍କ ପବିତ୍ର ନଗରୀ ଅଯୋଧ୍ୟାରେ ଦୀପୋତ୍ସବକୁ ଭବ୍ୟ ଓ ଐତିହାସିକ କରିବା ପାଇଁ ଜୋରଦାର ପ୍ରସ୍ତୁତି ଚାଲିଛି। ଏହି ଅବସରରେ ସରଯୂ ନଦୀକୂଳ ସମେତ ୫୬ରୁ ଅଧିକ ଘାଟରେ ୩୦ ଲକ୍ଷରୁ ଅଧିକ ମାଟିଦୀପ ଜଳାଯିବ। ଏଥିପାଇଁ ଘାଟଗୁଡ଼ିକର ସଫେଇ ପରେ ଚିହ୍ନଟ ଓ ବ୍ୟବସ୍ଥାପନ କାର୍ଯ୍ୟ ଚାଲିଛି।
ଉତ୍ତରପ୍ରଦେଶ ସରକାରଙ୍କ ସୂଚନା ଅନୁସାରେ, ଉତ୍ସବକୁ ସୁସଂଗଠିତ ଭାବେ ଆୟୋଜନ କରିବା ପାଇଁ ରାମ ମନୋହର ଲୋହିଆ ଅବଧ ବିଶ୍ୱବିଦ୍ୟାଳୟ ଓ ଏହା ଅଧୀନସ୍ଥ ଅନ୍ୟ ଶିକ୍ଷାନୁଷ୍ଠାନର ୩୫ ହଜାରରୁ ଅଧିକ ସ୍ୱେଚ୍ଛାସେବୀଙ୍କୁ ନିୟୋଜିତ କରାଯିବ। ୩୦ଟି ଡିଗ୍ରୀ କଲେଜ, ୪୦ଟି ଇଣ୍ଟରମିଡିଏଟ୍ କଲେଜ ଓ ବିଶ୍ୱବିଦ୍ୟାଳୟ କ୍ୟାମ୍ପସରୁ ସ୍ୱେଚ୍ଛାସେବୀମାନେ ଏହି କାର୍ଯ୍ୟରେ ସାମିଲ ହେବେ।
ଦୀପ ସଜାଇବା, ତେଲ ଓ ବଳିତାର ବ୍ୟବସ୍ଥା କରିବା ଏବଂ ନିର୍ଦ୍ଧାରିତ ସମୟରେ ଦୀପ ଜଳାଇବା ନେଇ ସ୍ୱେଚ୍ଛାସେବୀଙ୍କୁ ସ୍ୱତନ୍ତ୍ର ପ୍ରଶିକ୍ଷଣ ଦିଆଯାଉଛି। ଗିନିଜ୍ ୱାର୍ଲ୍ଡ ରେକର୍ଡସ୍ର ନିର୍ଦ୍ଧାରିତ ମାନଦଣ୍ଡ ଅନୁସାରେ ସମସ୍ତ ବ୍ୟବସ୍ଥା କରିବା ଉପରେ ମଧ୍ୟ ଗୁରୁତ୍ୱ ଦିଆଯାଉଛି।
ସ୍ୱେଚ୍ଛାସେବୀଙ୍କ ଅନଲାଇନ୍ ପଞ୍ଜୀକରଣ ସହ ଫଟୋ, କ୍ୟୁଆର୍ କୋଡ୍ ଓ ନିୟୋଜନ ସ୍ଥାନ ଥିବା ପରିଚୟପତ୍ର ପ୍ରଦାନ କରାଯିବ। ଏହାଦ୍ୱାରା ପରିଚୟ ଯାଞ୍ଚ ଓ ଦାୟିତ୍ୱ ବଣ୍ଟନ ସହଜ ହେବ।
ବିଶ୍ୱବିଦ୍ୟାଳୟର କୁଳପତି ବିଜେନ୍ଦ୍ର ସିଂହଙ୍କ କହିବା ଅନୁସାରେ, ଦୀପୋତ୍ସବ ସନାତନ ସଂସ୍କୃତିର ଆଲୋକ, ଜନସାଧାରଣଙ୍କ ଆସ୍ଥା ଓ ସାମୂହିକ ଭକ୍ତିର ପ୍ରତୀକ। ରାମ ମନ୍ଦିରରେ ରାମଲଲାଙ୍କ ପ୍ରାଣପ୍ରତିଷ୍ଠା ପରେ ଅଯୋଧ୍ୟାର ଏହି ଭବ୍ୟ ଦୀପୋତ୍ସବ ଉପରେ ଦେଶ ଓ ବିଶ୍ୱର ନଜର ରହିଛି।
