ରାହୁଲଙ୍କୁ ମୋଦିଙ୍କ କଟାକ୍ଷ, କହିଲେ- ରକେଟ୍ଠାରୁ ଅଧିକ ଥର ନେତାଙ୍କୁ ପ୍ରତିଷ୍ଠିତ କରୁଛି କଂଗ୍ରେସ
କଂଗ୍ରେସକୁ ଟାର୍ଗେଟ୍ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କଟାକ୍ଷ କରିଛନ୍ତି। ଏନ୍ଡିଟିଭି ୱାର୍ଲ୍ଡ ସମିଟ୍ରେ ଉଦ୍ବୋଧନ ଦେଇ ସେ କହିଛନ୍ତି, ଦେଶରେ ରକେଟ୍ ଉତ୍କ୍ଷେପଣଠାରୁ ମଧ୍ୟ ଅଧିକ ଥର ନେତାଙ୍କୁ ପ୍ରତିଷ୍ଠିତ କରିବାରେ କଂଗ୍ରେସ ବ୍ୟସ୍ତ ରହିଛି। ଏହି ମନ୍ତବ୍ୟ ମାଧ୍ୟମରେ ସେ କଂଗ୍ରେସର ନେତୃତ୍ୱ ଓ ରାଜନୈତିକ କାର୍ଯ୍ୟଶୈଳୀକୁ ସମାଲୋଚନା କରିଛନ୍ତି।
ଏହି ଅବସରରେ ମୋଦି ଭାରତର ବଦଳୁଥିବା ବିଶ୍ୱ ପରିଚୟ ଉପରେ ମଧ୍ୟ ଗୁରୁତ୍ୱ ଦେଇଥିଲେ। ଭାରତ ଏବେ କେବଳ ବିଶ୍ୱର ‘ବ୍ୟାକ୍ ଅଫିସ୍’ ହୋଇ ରହିନାହିଁ, ବରଂ ‘ବ୍ରେନ୍ ଅଫିସ୍’ ଭାବେ ଉଭା ହେଉଛି ବୋଲି ସେ କହିଥିଲେ। ଅର୍ଥାତ୍, ଭାରତର ମାନବ ସମ୍ବଳ ସହ ଜ୍ଞାନ, ଦକ୍ଷତା ଓ ନବସୃଜନକୁ ମଧ୍ୟ ବିଶ୍ୱ ଗୁରୁତ୍ୱ ଦେଉଛି।
ପ୍ରଧାନମନ୍ତ୍ରୀ କହିଥିଲେ, ବିକଶିତ ଭାରତ ରୋଜଗାର ଯୋଜନା ଅଧୀନରେ ଅଳ୍ପ ସମୟ ମଧ୍ୟରେ ପ୍ରାୟ ୭୦ ଲକ୍ଷ ନୂଆ ନିଯୁକ୍ତି ସୃଷ୍ଟି ହୋଇଛି। ମଧ୍ୟବିତ୍ତଙ୍କ ଉପରୁ ଟିକସ ବୋଝ କମାଇବା ସହ ଦେଶର ଅର୍ଥନୈତିକ ବିକାଶ ଓ ନିଯୁକ୍ତି ସୃଷ୍ଟି ଦିଗରେ ସରକାରଙ୍କ ପଦକ୍ଷେପକୁ ମଧ୍ୟ ସେ ଉଲ୍ଲେଖ କରିଥିଲେ।
