ଏସିଆନ୍ ପାରା ଗେମ୍ସରେ ଓଡ଼ିଆ ଆଥଲେଟ୍ ଜୟନ୍ତୀ ବେହେରା ରୌପ୍ୟ ପଦକ ଜିତିଛନ୍ତି। ମହିଳା ୪୦୦ ମିଟର ଟି-୪୭ ବର୍ଗରେ ଜୟନ୍ତୀ ୧ ମିନିଟ୍ ୦୦.୬ ସେକେଣ୍ଡ ସମୟ ସହ ଦ୍ୱିତୀୟ ସ୍ଥାନରେ ରହିଥିଲେ। ଏହି ବର୍ଗରେ ଅଞ୍ଜନାବେନ ବୁମ୍ବାଡିଆ ୫୯.୯୭ ସେକେଣ୍ଡ ସମୟ ସହ ସ୍ୱର୍ଣ୍ଣ ଏବଂ ଥାଇଲାଣ୍ଡର ସାସିରାୱାନ ଇନ୍ତାଚୋତ ୧ ମିନିଟ୍ ୦୨.୫୮ ସେକେଣ୍ଡ ସମୟ ସହ କାଂସ୍ୟ ପଦକ ହାସଲ କରିଛନ୍ତି।

ମହିଳା ୪୦୦ ମିଟର ଟି-୧୨ ବର୍ଗରେ ଭାରତର ତେଜଲବେନ ଦାମୋର ୫୭.୬୦ ସେକେଣ୍ଡ ସମୟ ସହ ରୌପ୍ୟ ପଦକ ଜିତିଛନ୍ତି। ଏହା ଚଳିତ ଗେମ୍ସରେ ତାଙ୍କର ଦ୍ୱିତୀୟ ପଦକ। ପୂର୍ବରୁ ସେ ୨୦୦ ମିଟର ଟି-୧୨ ବର୍ଗରେ କାଂସ୍ୟ ପଦକ ପାଇଥିଲେ।

ସନ୍ତରଣରେ ଭାରତକୁ ଆଉ ଦୁଇଟି ପଦକ ମିଳିଛି। ପୁରୁଷ ୪୦୦ ମିଟର ଫ୍ରି-ଷ୍ଟାଇଲ୍ ଏସ୍‌୧୦ ବର୍ଗରେ କପିଲ କୁମାର ୪ ମିନିଟ୍ ୩୮.୪୪ ସେକେଣ୍ଡ ସମୟ ସହ ରୌପ୍ୟ ଜିତିଛନ୍ତି। ଜାପାନର ଅକିତୋ ମିନାଇ ୪ ମିନିଟ୍ ୨୭.୪୪ ସେକେଣ୍ଡ ସମୟ ସହ ଗେମ୍ସ ରେକର୍ଡ କରି ସ୍ୱର୍ଣ୍ଣ ପଦକ ହାସଲ କରିଥିବା ବେଳେ ଇରାନର ଶାହିନ୍ ଇଜାଦୟାର କାଂସ୍ୟ ଜିତିଛନ୍ତି।

ଅନ୍ୟପକ୍ଷରେ ପୁରୁଷ ୧୦୦ ମିଟର ବ୍ରେଷ୍ଟ-ଷ୍ଟ୍ରୋକ୍ ଏସ୍‌ବି୯ ବର୍ଗରେ ସ୍ୱାତିକ ପଟେଲ ୧ ମିନିଟ୍ ୧୩.୭୭ ସେକେଣ୍ଡ ସମୟ ସହ କାଂସ୍ୟ ପଦକ ହାସଲ କରିଛନ୍ତି। ଇରାନର ସିନା ଜେଘାମିନେଜାଦ ସ୍ୱର୍ଣ୍ଣ ଏବଂ ଶାହିନ୍ ଇଜାଦୟାର ରୌପ୍ୟ ପଦକ ଜିତିଛନ୍ତି।

ଏହି ପଦକ ସଫଳତା ଏସିଆନ୍ ପାରା ଗେମ୍ସରେ ଭାରତୀୟ ଖେଳାଳିଙ୍କ ଦୃଢ଼ ପ୍ରଦର୍ଶନକୁ ପ୍ରତିଫଳିତ କରୁଛି।