ଦେଶରେ ଲକଡାଉନ୍ ଲାଗୁ ହେବା ନେଇ ଚାଲିଥିବା ଅଫବାହକୁ ସଂପୂର୍ଣ୍ଣ ଭାବେ ଖଣ୍ଡନ କରିଛନ୍ତି କେନ୍ଦ୍ରମନ୍ତ୍ରୀ କିରେନ ରିଜିଜୁ। ସେ କହିଛନ୍ତି ଯେ ଦେଶରେ ଏପରି କୌଣସି ପରିସ୍ଥିତି ନାହିଁ ଏବଂ ସାଧାରଣ ଲୋକଙ୍କୁ କୌଣସି ସମସ୍ୟା ହେବାକୁ ଦିଆଯିବ ନାହିଁ।
ସେହିସହିତ, ପେଟ୍ରୋଲ ଓ ଡିଜେଲ୍ ଉପରେ ଏକ୍ସାଇଜ୍ ଶୁଳ୍କ କମାଇବା ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସିଦ୍ଧାନ୍ତକୁ ସେ ସ୍ୱାଗତ କରିଛନ୍ତି। ଏହାକୁ ସେ ଏକ “ଇତିହାସିକ ପଦକ୍ଷେପ” ବୋଲି ବର୍ଣ୍ଣନା କରି କହିଛନ୍ତି ଯେ, ଜାଗତିକ ଅନିଶ୍ଚିତତା ମଧ୍ୟରେ ସାଧାରଣ ଲୋକଙ୍କୁ ସୁରକ୍ଷା ଦେବା ପାଇଁ ଏହି ନିଷ୍ପତ୍ତି ନିଆଯାଇଛି।
ରିଜିଜୁ କହିଛନ୍ତି ଯେ ଭାରତ ତେଲ ଓ ଗ୍ୟାସ ପାଇଁ ବହୁତ ଅଂଶରେ ଆମଦାନି ଉପରେ ନିର୍ଭର କରେ। ଏପରି ପରିସ୍ଥିତିରେ ମୂଲ୍ୟ ବୃଦ୍ଧିକୁ ନିୟନ୍ତ୍ରଣରେ ରଖିବା ସରକାରଙ୍କ ପାଇଁ ବଡ଼ ଚ୍ୟାଲେଞ୍ଜ ଥିଲା। ତଥାପି ପେଟ୍ରୋଲରେ ଏକ୍ସାଇଜ୍ ଶୁଳ୍କ କମାଇ ୩ ଟଙ୍କା କରାଯାଇଥିବାବେଳେ ଡିଜେଲକୁ ପୂରାପୂରି ଶୁଳ୍କମୁକ୍ତ କରାଯାଇଛି ବୋଲି ସେ କହିଛନ୍ତି।
ଲକଡାଉନ୍ ନେଇ ଚାଲିଥିବା ଅଫବାହ ବିଷୟରେ ସେ ସପ୍ଷ୍ଟ କରିଛନ୍ତି ଯେ ଏହା ଭ୍ରାନ୍ତିକର ସୂଚନା। ସରକାର ପୂର୍ଣ୍ଣ ଭାବେ ପରିସ୍ଥିତି ଉପରେ ନିୟନ୍ତ୍ରଣ ରଖିଛି ଏବଂ କୌଣସି ପ୍ରକାର ଭୟ ସୃଷ୍ଟି କରିବା ଆବଶ୍ୟକ ନାହିଁ।
ସେ ରାଜ୍ୟ ସରକାରମାନଙ୍କୁ ଇଂଧନ ସଂଗ୍ରହ (ହୋର୍ଡିଂ) ରୋକିବା ସହିତ ଯଥେଷ୍ଟ ଯୋଗାଣ ନିଶ୍ଚିତ କରିବାକୁ ଆହ୍ୱାନ କରିଛନ୍ତି। ପେଟ୍ରୋଲ, ଡିଜେଲ୍ ଓ ଏଲପିଜି କୌଣସି ସ୍ଥାନରେ ଅଭାବ ନ ହେଉ ଯାହାପାଇଁ ସମସ୍ତଙ୍କୁ ଏକତ୍ର ହୋଇ କାମ କରିବାକୁ ସେ ଅନୁରୋଧ କରିଛନ୍ତି।
ସଂସଦ ସଦସ୍ୟମାନେ ମଧ୍ୟ ପ୍ରଧାନମନ୍ତ୍ରୀଙ୍କ ଏହି ନିଷ୍ପତ୍ତିକୁ ସ୍ୱାଗତ କରିବେ ବୋଲି ରିଜିଜୁ କହିଛନ୍ତି। ସେ ଉଲ୍ଲେଖ କରିଛନ୍ତି ଯେ, ଏହି ପଦକ୍ଷେପ ସାଧାରଣ ଲୋକଙ୍କ ହିତକୁ ମନେରଖି ନିଆଯାଇଛି ଏବଂ ଏହାକୁ ଜମିସ୍ତରରେ କାମ୍ୟବନ୍ତ କରିବା ପାଇଁ ସମସ୍ତଙ୍କ ସହଯୋଗ ଆବଶ୍ୟକ।
ସମଗ୍ର ପରିସ୍ଥିତିକୁ ଦୃଷ୍ଟିରେ ରଖି ସେ କହିଛନ୍ତି, ଏହା ଏକ ସଙ୍କଟକାଳୀନ ସମୟ ଏବଂ ସମସ୍ତଙ୍କୁ ଏକ ଦଳ ଭାବେ କାମ କରିବା ଦରକାର, ଯାହାଦ୍ୱାରା ଇଂଧନ ଯୋଗାଣ ସୁଚାରୁ ଭାବେ ଚାଲି ରହିବ ଓ ଲୋକମାନେ କୌଣସି ଅସୁବିଧାର ସମ୍ମୁଖୀନ ହେବେ ନାହିଁ।
