ପାଟନା: ଗଙ୍ଗା, ସୋନ, ପୁନପୁନ ଓ ଦର୍ଧା ନଦୀର ଜଳସ୍ତର ବଢ଼ିବା ଯୋଗୁଁ ବିହାରର ପାଟନା ଜିଲ୍ଲାରେ ବନ୍ୟା ସ୍ଥିତି ଗମ୍ଭୀର ହୋଇପଡ଼ିଛି। ଦିଆରା ଓ ଗ୍ରାମାଞ୍ଚଳ ସହିତ ସହରର ଅନେକ ଅଞ୍ଚଳରେ ମଧ୍ୟ ବନ୍ୟାଜଳ ପ୍ରବେଶ କରିଛି। ଦାନାପୁର, ମାନେର, ମୋକାମା ଓ ବଖତିୟାରପୁରର ବିଭିନ୍ନ ଅଞ୍ଚଳର ଲୋକଙ୍କୁ ସୁରକ୍ଷିତ ସ୍ଥାନକୁ ଚାଲିଯିବାକୁ କୁହାଯାଇଛି।
ପାଟନାର ଦିଘା ଅଞ୍ଚଳର ବିନ୍ଦ ଟୋଲିରେ ବନ୍ୟାପାଣି ପଶିବାରୁ ଅନେକ ଘର ବୁଡ଼ିଯାଇଛି। ପ୍ରାୟ ୧,୫୦୦ ପରିବାର ଜେପି ଗଙ୍ଗା ପଥରେ ପ୍ଲାଷ୍ଟିକ୍ ତମ୍ବୁ ତଳେ ଆଶ୍ରୟ ନେଇଥିବା ଜଣାପଡ଼ିଛି। ବିସ୍ଥାପିତ ଲୋକମାନେ ଖାଦ୍ୟ ଓ ପାନୀୟ ଜଳ ପାଇଁ ମଧ୍ୟ ହଇରାଣ ହେଉଛନ୍ତି।
ବନ୍ୟାଜଳରେ ଜିଲ୍ଲାର ବିଭିନ୍ନ ପଞ୍ଚାୟତର ଶହ ଶହ ଏକର ଧାନ ଓ ମକା ଫସଲ ନଷ୍ଟ ହୋଇଛି। ଅନେକ ଗ୍ରାମୀଣ ରାସ୍ତା ଜଳମଗ୍ନ ହେବା ସହ କ୍ଷତିଗ୍ରସ୍ତ ହୋଇଛି। ଫଳରେ ଗ୍ରାମାଞ୍ଚଳରେ ଯାତାୟାତ ଓ ଯୋଗାଯୋଗ ବାଧାପ୍ରାପ୍ତ ହୋଇଛି। ବହୁ ଲୋକ ଘରେ ଫସି ରହିଥିବା ବେଳେ ଆଉ କେତେକ ଉଚ୍ଚ ସ୍ଥାନ, ରେଳ ଷ୍ଟେସନ, ସ୍କୁଲ ଓ ରାସ୍ତାରେ ଆଶ୍ରୟ ନେଇଛନ୍ତି।
ମାନେରର ଇସଲାମଗଞ୍ଜ ଗ୍ରାମ ଗଙ୍ଗା ଓ ସୋନ ନଦୀ ମଧ୍ୟରେ ଥିବାରୁ ବନ୍ୟା ଯୋଗୁଁ ଏହା ପ୍ରାୟ ଏକ ଦ୍ୱୀପରେ ପରିଣତ ହୋଇଛି। ସେଠାରେ ଲୋକଙ୍କୁ ରୋଷେଇ କରିବା ସହ ଦୈନନ୍ଦିନ ଆବଶ୍ୟକତା ପୂରଣରେ ବହୁ ସମସ୍ୟା ହେଉଛି।
ମୋକାମା ଦିଆରା ଅଞ୍ଚଳର ଅନେକ ଗାଁକୁ ମଧ୍ୟ ଗଙ୍ଗାଜଳ ପ୍ରବେଶ କରିଛି। ଶିବନାର ପଞ୍ଚାୟତର ଜଞ୍ଜିରା ଦିଆରା ଓ କସାହା ଦିଆରା ଅଞ୍ଚଳର ପାଞ୍ଚଟି ଗାଁ ବନ୍ୟା ପ୍ରଭାବିତ ହୋଇଛି। ଜଞ୍ଜିରା ଦିଆରାର ୧୫୦ରୁ ଅଧିକ ଲୋକ ଗୋରୁଗାଈଙ୍କୁ ସାଙ୍ଗରେ ନେଇ ମୋକାମା ବ୍ଲକ କାର୍ଯ୍ୟାଳୟରେ ଆଶ୍ରୟ ନେଇଛନ୍ତି। ତେବେ ରିଲିଫ୍ ବ୍ୟବସ୍ଥା ଆବଶ୍ୟକତା ଅନୁଯାୟୀ ହେଉନଥିବା ଅଭିଯୋଗ ହୋଇଛି।
ଅନ୍ୟପଟେ, ଧନରୁଆ ବ୍ଲକର ବୀର ଅଞ୍ଚଳର ମହୁଆତାଡ ନିକଟରେ ଦର୍ଧା ନଦୀର ବନ୍ୟାଜଳ ଯୋଗୁଁ ବନ୍ଧର ପ୍ରାୟ ୨୦ରୁ ୨୫ ଫୁଟ ଅଂଶ ଭାଙ୍ଗିଯାଇଛି। ଏହାପରେ ପ୍ରାୟ ୩୦ଟି ଘରେ ପାଣି ପଶିଥିବା ବେଳେ ଅନେକ ଚାଷଜମି ମଧ୍ୟ ବୁଡ଼ିଯାଇଛି। ଗ୍ରାମବାସୀ ବନ୍ଧ ଉପରେ ଆଶ୍ରୟ ନେଇଛନ୍ତି।
ବନ୍ୟା ସ୍ଥିତିର ସମୀକ୍ଷା ପାଇଁ ବିହାର ମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ ପ୍ରଭାବିତ ଅଞ୍ଚଳର ଆକାଶମାର୍ଗରୁ ସର୍ଭେ କରିଛନ୍ତି। ସେ ଅଧିକାରୀମାନଙ୍କୁ ଉଦ୍ଧାର ଓ ରିଲିଫ୍ କାର୍ଯ୍ୟ ତ୍ୱରାନ୍ୱିତ କରିବା ସହ ପ୍ରଭାବିତ ଲୋକଙ୍କୁ ଶୀଘ୍ର ସହାୟତା ପହଞ୍ଚାଇବାକୁ ନିର୍ଦ୍ଦେଶ ଦେଇଛନ୍ତି। ଲୋକଙ୍କ ଜୀବନ ଓ ସମ୍ପତ୍ତିର ସୁରକ୍ଷା ସରକାରଙ୍କ ସର୍ବୋଚ୍ଚ ପ୍ରାଥମିକତା ବୋଲି ସେ କହିଛନ୍ତି।
