ସେମିକଣ୍ଡକ୍ଟର ଶିଳ୍ପରେ ଭାରତର ବଡ଼ ପଦକ୍ଷେପ, ‘ସେମିକନ୍ ଇଣ୍ଡିଆ ୨୦୨୬’ ଉଦ୍ଘାଟନ
ନୂଆଦିଲ୍ଲୀ: ବିଶ୍ୱ ସେମିକଣ୍ଡକ୍ଟର ଶିଳ୍ପରେ ଭାରତର ଭୂମିକାକୁ ଆହୁରି ବ୍ୟାପକ କରିବା ଲକ୍ଷ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁରୁବାର ‘ସେମିକନ୍ ଇଣ୍ଡିଆ ୨୦୨୬’ର ପଞ୍ଚମ ସଂସ୍କରଣ ଉଦ୍ଘାଟନ କରିଛନ୍ତି। ‘ସିଲିକନ୍ ଟୁ ସିଷ୍ଟମ୍ସ: ବିଲ୍ଡିଂ ଦି ଇକୋସିଷ୍ଟମ୍’ ଥିମ୍ରେ ଆୟୋଜିତ ତିନିଦିନିଆ ସମ୍ମିଳନୀରେ ବିଶ୍ୱର ପ୍ରମୁଖ ପ୍ରଯୁକ୍ତି କମ୍ପାନୀ, ନିବେଶକ ଓ ନୀତି ନିର୍ଦ୍ଧାରକମାନେ ଯୋଗ ଦେଇଛନ୍ତି।
ଭାରତକୁ ସେମିକଣ୍ଡକ୍ଟର ନିର୍ମାଣ ଓ ଚିପ୍ ଡିଜାଇନ୍ର ଏକ ପ୍ରମୁଖ କେନ୍ଦ୍ରରେ ପରିଣତ କରିବା ଉପରେ ଏହି ଆୟୋଜନରେ ଗୁରୁତ୍ୱ ଦିଆଯାଉଛି। ଉଦ୍ଘାଟନ ପୂର୍ବରୁ ପ୍ରଧାନମନ୍ତ୍ରୀ ମାଇକ୍ରୋନ୍, ଏଏସ୍ଏମ୍ଏଲ୍, ଆପ୍ଲାଏଡ୍ ମ୍ୟାଟେରିଆଲ୍ସ, ଇଣ୍ଟେଲ ଓ ଟାଟା ଇଲେକ୍ଟ୍ରୋନିକ୍ସ ଭଳି ବିଶ୍ୱସ୍ତରୀୟ କମ୍ପାନୀର ସିଇଓମାନଙ୍କ ସହ ବୈଠକ କରିଥିଲେ। ଏଥିରେ ନବସୃଜନ, ଗବେଷଣା ଓ ଦକ୍ଷତା ବିକାଶ ଉପରେ ସହଯୋଗ ନେଇ ଆଲୋଚନା ହୋଇଥିଲା।
ସରକାରଙ୍କ ନୂଆ ‘ଇଣ୍ଡିଆ ସେମିକଣ୍ଡକ୍ଟର ମିଶନ୍ ୨.୦’ ପାଇଁ ୧.୨୭ ଲକ୍ଷ କୋଟି ଟଙ୍କାର ବ୍ୟୟବରାଦ କରାଯାଇଛି। ପ୍ରଥମ ପର୍ଯ୍ୟାୟରେ ୧୨ଟି ନିର୍ମାଣ ଓ ଆସେମ୍ବଲି ପ୍ରକଳ୍ପ ଆରମ୍ଭ ହୋଇଥିବା ବେଳେ ମିଶନ୍ ୨.୦ରେ ଦେଶୀୟ ଚିପ୍ ଡିଜାଇନ୍, ଭାରତୀୟ ବୌଦ୍ଧିକ ସମ୍ପତ୍ତି ଏବଂ ସ୍ଥାନୀୟ ଯୋଗାଣ ଶୃଙ୍ଖଳ ବିକାଶ ଉପରେ ଅଧିକ ଗୁରୁତ୍ୱ ରହିଛି।
ସିଲିକନ୍ ୱେଫର ଫ୍ୟାବ୍ ପାଇଁ ୪୦ ପ୍ରତିଶତ ଏବଂ ଉନ୍ନତ ପ୍ୟାକେଜିଂ ୟୁନିଟ୍ ପାଇଁ ୩୫ ପ୍ରତିଶତ ପର୍ଯ୍ୟନ୍ତ ପୁଞ୍ଜି ବ୍ୟୟ ସହାୟତା ଦେବାକୁ ସରକାର ବ୍ୟବସ୍ଥା କରିଛନ୍ତି। ଏଥିସହ ୧ ଲକ୍ଷ ନୂଆ ସେମିକଣ୍ଡକ୍ଟର ଇଞ୍ଜିନିୟରଙ୍କୁ ପ୍ରଶିକ୍ଷଣ ଦେବା ଲକ୍ଷ୍ୟ ରହିଛି। ଶିଳ୍ପର ସମ୍ପ୍ରସାରଣ ଫଳରେ ଦେଶରେ ପ୍ରାୟ ୫୦ରୁ ୬୦ ହଜାର ପ୍ରତ୍ୟକ୍ଷ ନିଯୁକ୍ତି ସୃଷ୍ଟି ହେବାର ଆକଳନ କରାଯାଇଛି।
