ୱାଶିଂଟନ୍: ହର୍ମୁଜ ପ୍ରଣାଳୀ ପୁନର୍ବାର ଖୋଲିବା ନେଇ ଇରାନର ପ୍ରସ୍ତାବକୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରତ୍ୟାଖ୍ୟାନ କରିଛନ୍ତି। ହ୍ୱାଇଟ୍ ହାଉସ୍ରେ ସାମ୍ବାଦିକମାନଙ୍କୁ ଟ୍ରମ୍ପ କହିଛନ୍ତି ଯେ, ଇରାନ ଏପରି ଏକ ବୁଝାମଣା ଚାହୁଁଛି, ଯାହା ଅନୁସାରେ ତୁରନ୍ତ ହର୍ମୁଜ ପ୍ରଣାଳୀ ଖୋଲାଯିବ। କିନ୍ତୁ ସେ ଏହି ପ୍ରସ୍ତାବକୁ ଗ୍ରହଣ କରିନାହାନ୍ତି।
ଟ୍ରମ୍ପଙ୍କ ଦାବି ଅନୁସାରେ, ହର୍ମୁଜ ପ୍ରଣାଳୀ ବନ୍ଦ ରହିବାରୁ ଇରାନର ରାଜସ୍ୱ ଉପରେ ପ୍ରଭାବ ପଡ଼ିଛି। ଇରାନ ଏବେ ଆର୍ଥିକ ଚାପରେ ଥିବାରୁ ଏହି ଜଳପଥକୁ ତୁରନ୍ତ ଖୋଲିବାକୁ ଚାହୁଁଛି ବୋଲି ସେ କହିଛନ୍ତି। ତେବେ ଏହି ଦାବି ନେଇ ଇରାନ ପକ୍ଷରୁ ତତ୍କାଳ ସ୍ପଷ୍ଟ ପ୍ରତିକ୍ରିୟା ମିଳିନାହିଁ।
ଟ୍ରମ୍ପ କହିଛନ୍ତି ଯେ, ହର୍ମୁଜ ପ୍ରଣାଳୀ ବନ୍ଦ କରି ଇରାନ ବିଶ୍ୱ ପାଇଁ ସମସ୍ୟା ସୃଷ୍ଟି କରିବାକୁ ଚାହିଁଥିଲା। ଏହାର ଜବାବରେ ଆମେରିକା ପକ୍ଷରୁ ବଡ଼ ଧରଣର ଅବରୋଧ ବ୍ୟବସ୍ଥା କରାଯାଇଥିବା ସେ ଦାବି କରିଛନ୍ତି।
ହ୍ୱାଇଟ୍ ହାଉସ୍ ପରିସରରେ ‘ମେରାଇନ୍ ୱାନ୍’ ହେଲିକପ୍ଟରରେ ଚଢ଼ିବା ସମୟରେ ଟ୍ରମ୍ପ କହିଥିଲେ, ଇରାନ ଏବେ ହର୍ମୁଜ ପ୍ରଣାଳୀ ଖୋଲିବା ପାଇଁ ବୁଝାମଣା ଚାହୁଁଛି। କିନ୍ତୁ ସେ ଏହାକୁ ଖାରଜ କରିଛନ୍ତି ଏବଂ ଇରାନ ଏକ ବଡ଼ ପରାଜୟର ସମ୍ମୁଖୀନ ହେଉଥିବା ଦାବି କରିଛନ୍ତି।
ଏହା ପୂର୍ବରୁ ଜାତିସଂଘ ସାଧାରଣ ସଭା ସମୟରେ ଆମେରିକା ଓ ଇରାନ ମଧ୍ୟରେ ପରୋକ୍ଷ ଆଲୋଚନା ହୋଇଥିଲା। ହର୍ମୁଜ ପ୍ରଣାଳୀ ବିଶ୍ୱର ଏକ ପ୍ରମୁଖ ତୈଳ ପରିବହନ ଜଳପଥ ହୋଇଥିବାରୁ ଏହାକୁ ନେଇ ଦୁଇ ଦେଶ ମଧ୍ୟରେ ଜାରି ରହିଥିବା ତିକ୍ତତା ଅନ୍ତର୍ଜାତୀୟ ଶକ୍ତି ବଜାର ଉପରେ ମଧ୍ୟ ପ୍ରଭାବ ପକାଇଛି।
