କଟକ:ଏସସିବି ମେଡିକାଲ କଲେଜ ଓ ହସ୍ପିଟାଲରେ ୧୪ ଜଣ ନବଜାତ ଶିଶୁ ‘ନିଖୋଜ’ ଅଭିଯୋଗକୁ ନେଇ ରାଜ୍ୟ ଶିଶୁ ସୁରକ୍ଷା ଆୟୋଗ (OSCPCR) ମଙ୍ଗଳବାର ରେକର୍ଡ ଯାଞ୍ଚ କରିଛି ଏବଂ ହସ୍ପିଟାଲ କର୍ତ୍ତୃପକ୍ଷଙ୍କୁ ବିସ୍ତୃତ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛି।
ଗତ ୬ ବର୍ଷର ରେକର୍ଡରେ ଅସମଞ୍ଜସତା ଥିବା ସନ୍ଦେହରେ ଏହି ଯାଞ୍ଚ କରାଯାଇଥିଲା। ବିଶେଷକରି ମାନସିକ ଭାବେ ଅସୁସ୍ଥ ଓ ଅସହାୟ ମହିଳାମାନଙ୍କ ମାମଲା ଉପରେ ଧ୍ୟାନ ଦିଆଯାଇଛି।
ଆୟୋଗର ଅଧ୍ୟକ୍ଷା ବବିତା ପାତ୍ର କହିଛନ୍ତି, କିଛି ମାମଲାରେ ଶିଶୁମାନଙ୍କୁ ଜନ୍ମଦାତା ପିତାମାତାଙ୍କୁ ହସ୍ତାନ୍ତର କିମ୍ବା ଅନୁମୋଦିତ ସଂସ୍ଥାକୁ ଦିଆଯାଇଥିବା ଦେଖାଯାଇଛି। ସମସ୍ତ ପ୍ରକ୍ରିୟା ନିୟମ ଅନୁଯାୟୀ ହୋଇଛି କି ନାହିଁ, ସେଥିରେ ମଧ୍ୟ ଯାଞ୍ଚ ହେଉଛି।
ଏପରିକି, ଆବଶ୍ୟକ ହେଲେ ସମ୍ବନ୍ଧିତ ସଂସ୍ଥାମାନଙ୍କୁ ନୋଟିସ ଜାରି କରାଯିବ ବୋଲି ସେ ଜଣାଇଛନ୍ତି।
ଏହି ଘଟଣା ପରେ ପ୍ରଶାସନ ମଧ୍ୟ ସଚେତନ ହୋଇଛି। କଟକ ଜିଲ୍ଲାପାଳ କହିଛନ୍ତି ଯେ RDC ପକ୍ଷରୁ ହସ୍ପିଟାଲ ସୁପରିଣ୍ଟେଣ୍ଡେଣ୍ଟଙ୍କୁ ବିସ୍ତୃତ ତଦନ୍ତ କରି ରିପୋର୍ଟ ଦେବାକୁ ନିର୍ଦ୍ଦେଶ ମିଳିଛି।
ଏହି ସମ୍ବେଦନଶୀଳ ମାମଲାକୁ ଦୃଷ୍ଟିରେ ରଖି ସମସ୍ତ ରେକର୍ଡର ଗଭୀର ଯାଞ୍ଚ ଜାରି ରହିଛି।
