ବଳାଙ୍ଗିର : ଭାଇ ସାଜିଲା ଭଗାରୀ । ସାମାନ୍ୟ କଥାରୁ ରକ୍ତମୁଖା ସାଜିଲା ବଡ଼ଭାଇ । ପନିକିରେ ସାନ ଭାଇର ତଣ୍ଟି କାଟିଦେଲା ବଡ ଭାଇ। ସାନ ଭାଇ ଏବେ ମୃତ୍ୟୁ ସହ ସଂଘର୍ଷ କରୁଥିବା ବେଳେ ଫେରାର ହୋଇଯାଇଛି ବଡ଼ ଭାଇ । ଏଭଳି ଏକ ଅଭାବନୀୟ ଘଟଣା ଘଟିଛି ବଲାଙ୍ଗିର ଜିଲ୍ଲା ତୁରେକେଲା ତାନା ନିକଟସ୍ଥ ବୁଢିବାହାଲ ଗ୍ରାମରେ। ଆକ୍ରମଣରେ ଗୁରୁତର ହୋଇଥିବା ଯୁବକ ଜଣକ ହେଲେ ବୁଢିବାହାଲ ଗାଁର ବେଣୁଧର ପୁଟାଙ୍କ ସାନ ପୁଅ ସନ୍ତୋଷ ପୁଟା ଓ ଅଭିଯୁକ୍ତ ହେଲେ ତାଙ୍କ ବଡ଼ ମଝିଆ ପୁଅ ଧନୁଜ ପୁଟା । ଗତକାଲି ରାତିରେ ଧନୁଜ ପୁଟା ନିଶାସକ୍ତ ଅବସ୍ଥାରେ ଘରକୁ ଫେରିଥିଲେ। ଏହାପରେ ସେ ସାନ ଭାଇ ସନ୍ତୋଷ ପୁଟାକୁ ଅସଭ୍ୟ ଭାଷାରେ ଗାଲିଗୁଲଜ କରିଥିଲେ। ସନ୍ତୋଷ ଏହାର ପ୍ରତିବାଦ କରିବାରୁ ନିଶାସକ୍ତ ବଡ ଭାଇ ହିତାହିତ ଜ୍ଞାନ ଭୁଲି ପନିକିରେ ସାନ ଭାଇର ବେକକୁ ହାଣିଦେଇଥିଲା । ଧନୁଜ ସାନଭାଇ ସନ୍ତୋଷର ବେକକୁ ପନିକିରେ କାଟି ଦେଇ ଫେରାର ହୋଇଯାଇଛି। ଗୁରୁତର ଅବସ୍ଥାରେ ୨୫ ବର୍ଷୀୟ ସନ୍ତୋଷଙ୍କୁ ପରିବାର ଲୋକେ ପ୍ରଥମେ କଣ୍ଟାବାଞ୍ଜି ହସ୍ପିଟାଲରେ ଭର୍ତ୍ତି କରିଥିଲେ। ଅବସ୍ଥା ଗୁରୁତର ହେବାରୁ ତାଙ୍କୁ ବଲାଙ୍ଗିର ଭୀମଭୋଇ ମେଡିକାଲ କଲେଜ ହସ୍ପିଟାଲରେ ଭର୍ତ୍ତି କରାଯାଇଛି । ପରିବାର ତରଫରୁ ଏ ପର୍ଯ୍ୟନ୍ତ ତୁରେକେଲା ଥାନାରେ କୌଣସି ଲିଖିତ ଅଭିଯୋଗ ଦିଆଯାଇନଥିବା ସୂଚନା ମିଳିଛି ।
