ପୁରୀ ସଦାଶିବ ସଂସ୍କୃତ ବିଶ୍ଵବିଦ୍ୟାଳୟର ହେବ ନବକଳେବର

ପୁରୀ ସଦାଶିବ କେନ୍ଦ୍ରୀୟ ସଂସ୍କୃତ ବିଶ୍ୱବିଦ୍ୟାଳୟର ନବକଳେବର ହେବ। ଏଥିପାଇଁ କେନ୍ଦ୍ର ସରକାର ମଞ୍ଜୁର କରିଥିବା ୧୦୦ କୋଟି ଟଙ୍କାର ପ୍ରକଳ୍ପକୁ ଶନିବାର କେନ୍ଦ୍ର ଶିକ୍ଷା, ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଶିଳାନ୍ୟାସ କରିଛନ୍ତି। ଏହି ପ୍ରକଳ୍ପ ଅଧୀନରେ ପୁରୀ ସଦାଶିବ ସଂସ୍କୃତ ବିଶ୍ୱବିଦ୍ୟାଳୟରେ ୮ ମହଲା ବିଶିଷ୍ଟ ପ୍ରଶାସନିକ ଓ ଶୈକ୍ଷିକ ଭବନ ନିର୍ମାଣ ହେବ। ଏଥିସହିତ ମନ୍ତ୍ରୀ ଶ୍ରୀ ପ୍ରଧାନ ୫ ମହଲା ବିଶିଷ୍ଟ ମହିଳା ଓ ପୁରୁଷ ଛାତ୍ରାବାସର ଶିଳାନ୍ୟାସ କରିଛନ୍ତି । ପୁରୀ ତାଳବଣିଆ ଠାରେ ୧୦ ଏକର ପରିମିତ ଜମିରେ ବିଶ୍ୱବିଦ୍ୟାଳୟର ସମସ୍ତ କୋଠା ନିର୍ମାଣ ହେବ । ଏହି ଅବସରରେ ବିଶ୍ୱବିଦ୍ୟାଳୟ​ରେ ଲକ୍ଷ୍ମୀ ପୁରାଣ ସଂପର୍କରେ ଆୟୋଜିତ ତିନି ଦିନିଆ ଅନ୍ତରାଷ୍ଟ୍ରୀୟ ସମ୍ମିଳନୀରେ ସେ ଯୋଗ ଦେଇଥିଲେ।

ଶ୍ରୀ ପ୍ରଧାନ କହିଥିଲେ ଭାରତ ସଂସ୍କୃତ, ତାମିଲ ଭଳି ପ୍ରାଚୀନ ଭାଷାର ଏବଂ ଅନେକ ସମୃଦ୍ଧ ଭାଷାର ଦେଶ । ସାଂପ୍ରତିକ ସମୟରେ ଚିରସ୍ଥାୟୀ ଭାରତୀୟ ଜ୍ଞାନ ପରମ୍ପରା ଏବଂ ବୈଦିକ ସାହିତ୍ୟର ପ୍ରାସଙ୍ଗିକତା ଆହୁରି ଅଧିକ। ଲକ୍ଷ୍ମୀ ପୁରାଣ ଓ ବେଦର ଜ୍ଞାନ, ମୂଲ୍ୟବୋଧ ଓ ବାର୍ତ୍ତାକୁ ଗ୍ରହଣ କରି ଆମେ ସାମାଜିକ ନ୍ୟାୟ, ମହିଳା ସଶକ୍ତୀକରଣ ଓ ମହିଳାଙ୍କ ନେତୃତ୍ବାଧୀନ ବିକାଶ ଦିଗରେ ଅଗ୍ରସର ହୋଇପାରିବା । ମୋର ବିଶ୍ୱାସ ଯେ କେନ୍ଦ୍ରୀୟ ସଂସ୍କୃତ ବିଶ୍ୱବିଦ୍ୟାଳୟ ସଂସ୍କୃତ ସମେତ ଭାରତୀୟ ଭାଷା, ସାହିତ୍ୟ ଏବଂ ଐତିହ୍ୟ ସହିତ ନୂତନ ପିଢ଼ିକୁ ଯୋଡ଼ିବା ପାଇଁ କାର୍ଯ୍ୟ କରିବ।