କର୍ମଚାରୀ ଭବିଷ୍ୟନିଧି ପାଣ୍ଠି ସୁଧହାର ବୃଦ୍ଧି ନେଇ ଘୋଷଣା କରିଛି ଇପିଏଫଓ । ନିର୍ବାଚନ ପୂର୍ବରୁ ଇପିଏଫ ଖାତାଧାରୀଙ୍କ ପାଇଁ ଏହା ଖୁସି ଖବର ହୋଇଛି । ସୁଧହାର ୮.୧୫%ରୁ ୮.୨୫%କୁ ବୃଦ୍ଧି କରାଯାଇଛି । ସୁଧହାର ବୃଦ୍ଧି ହେବାରୁ ଲକ୍ଷଲକ୍ଷ କର୍ମଚାରୀ ଉପକୃତ ହେବେ । ଗତ ୩ବର୍ଷରେ ଏହା ସର୍ବାଧିକ ସୁଧହାର । ୨୦୨୧-୨୨ରେ ସୁଧହାର ୮.୧ପ୍ରତିଶତ ଥିବା ବେଳେ ୨୦୨୨-୨୩ରେ ୮.୧୫% ରହିଥିଲା । ଏବେ ୨୦୨୩-୨୪ରେ ଏହାକୁ ବୃଦ୍ଧି କରି ୮.୨୫% କରାଯାଇଛି । ଇପିଏଫ୍ଓର ସର୍ବୋଚ୍ଚ ନିଷ୍ପତ୍ତି ଗ୍ରହଣକାରୀ ସଂସ୍ଥା, ‘ସେଣ୍ଟ୍ରାଲ୍ ଟ୍ରଷ୍ଟି ବୋର୍ଡ’ (ସିବିଟି) ଶନିବାର ହୋଇଥିବା ଏକ ବୈଠକରେ ୨୦୨୩-୨୪ ପାଇଁ ଇପିଏଫ ଉପରେ ୮.୨୫ ପ୍ରତିଶତ ସୁଧ ହାର ପ୍ରଦାନ କରିବାକୁ ନିଷ୍ପତ୍ତି ନେଇଛି।
