ଦୀପାବଳିରେ ବାଣ ଫୁଟାଇବାକୁ ଓପିସିବିର ଗାଇଡ୍ଲାଇନ୍, ରାତି ୯ଟା ଯାଏଁ ଅନୁମତି
ଦୀପାବଳିରେ ବାଣ ଫୁଟାଇବା ନେଇ ମାର୍ଗଦର୍ଶିକା ଜାରି କରିଛି ଓଡ଼ିଶା ପ୍ରଦୂଷଣ ନିୟନ୍ତ୍ରଣ ବୋର୍ଡ (ଓପିସିବି)। ଶନିବାର ଜାରି ଏହି ଗାଇଡ୍ଲାଇନ୍ରେ ପରିବେଶ ସୁରକ୍ଷା ସହ ଲୋକଙ୍କ ନିରାପତ୍ତା ଓ ଶବ୍ଦ ପ୍ରଦୂଷଣ ନିୟନ୍ତ୍ରଣ ଉପରେ ଗୁରୁତ୍ୱ ଦିଆଯାଇଛି।
ନିର୍ଦ୍ଦେଶ ଅନୁଯାୟୀ, ସନ୍ଧ୍ୟା ୭ଟାରୁ ରାତି ୯ଟା ମଧ୍ୟରେ କେବଳ ଖୋଲା ସ୍ଥାନରେ ସବୁଜ ବାଣ ଫୁଟାଇବାକୁ ପରାମର୍ଶ ଦିଆଯାଇଛି। ଉଦ୍ୟାନ, ପାର୍କ, ହସ୍ପିଟାଲ, ଶିକ୍ଷାନୁଷ୍ଠାନ, କୋର୍ଟ ଓ ଧାର୍ମିକ ସ୍ଥଳ ଭଳି ସମ୍ବେଦନଶୀଳ ସ୍ଥାନରେ ବାଣ ଫୁଟାଇବା ନିଷେଧ କରାଯାଇଛି। ନିୟମ ଉଲ୍ଲଙ୍ଘନ କଲେ ଆଇନ ଅନୁଯାୟୀ ଦଣ୍ଡବିଧାନ ହେବ।
ବାଣ କିଣିବା ସମୟରେ ତାହା ଅନୁମୋଦିତ ଓ ପ୍ରାମାଣିକ କି ନୁହେଁ, ଯାଞ୍ଚ କରିବାକୁ କୁହାଯାଇଛି। ପ୍ୟାକେଟ୍ରେ ସିଏସ୍ଆଇଆର୍-ନିରି ଲୋଗୋ ଓ କ୍ୟୁଆର୍ କୋଡ୍ ଥିବା ଆବଶ୍ୟକ। ବାଣ ତିଆରିରେ ବାରିୟମ୍ ଓ ଅନ୍ୟ ନିଷିଦ୍ଧ ରାସାୟନିକ ପଦାର୍ଥର ବ୍ୟବହାର ଉପରେ କଟକଣା ରହିଛି। ଅଧିକ ଶବ୍ଦ ସୃଷ୍ଟି କରୁଥିବା ବାଣ ନ ଫୁଟାଇବାକୁ ମଧ୍ୟ ପରାମର୍ଶ ଦିଆଯାଇଛି।
ସେହିପରି ପିଲାମାନେ ବାଣ ଫୁଟାଇବା ବେଳେ ବଡ଼ମାନେ ସେମାନଙ୍କ ପାଖରେ ରହିବା ଉଚିତ। ଫୁଟି ନଥିବା ବାଣକୁ ପୁଣି ଥରେ ଜଳାଇବାକୁ ଚେଷ୍ଟା ନ କରିବାକୁ ସତର୍କ କରାଯାଇଛି। ଦୀପାବଳି ପାଳନ ସମୟରେ ଅନ୍ୟମାନଙ୍କ ସୁବିଧା ଓ ସୁରକ୍ଷା ପ୍ରତି ଧ୍ୟାନ ଦେବାକୁ ବୋର୍ଡ ପରାମର୍ଶ ଦେଇଛି।
