କମ୍ପାନୀ ପାଇଁ ମାଗଣା ଖଟୁଛନ୍ତି ଭାରତର ଏକ ନମ୍ୱର ଧନୀ ମୁକେଶ ଅମ୍ୱାନୀ। ଗତବର୍ଷ କୋଭିଡ୍ ସମୟରେ ବିନା ଦରମାରେ କାମ କରିଥିବା ବେଳେ ଚଳିତ ବର୍ଷ ମଧ୍ୟ ସେ ଦରମା ନେବେ ନାହିଁ । ରିଲାଏନ୍ସ ଇଣ୍ଡଷ୍ଟ୍ରୀଜ୍ରେ ସେ କାର୍ଯ୍ୟ କରୁଥିବା ବେଳେ ଦରମା ବାବଦକୁ ଗତ ବର୍ଷ ଗୋଟିଏ ବି ଟଙ୍କା ସେ ନେଇନଥିଲେ । ମହାମାରୀ କାରଣରୁ କମ୍ପାନୀ ଉପରେ ବିଣିଜ୍ୟିକ ଓ ଅର୍ଥନୈତିକ ପ୍ରଭାବ ପଡିଥିବାରୁ ସେ ଦରମା ବାବଦ ଟଙ୍କା ନେଇନଥିଲେ । ଆର୍ଥିକ ବର୍ଷ ୨୦୨୦-୨୧ର ବାର୍ଷିକ ରିପୋର୍ଟରୁ ମୁକେଶଙ୍କ ଦରମା ଶୂନ ଥିବା ଜଣାପଡ଼ିଛି । ରିଲାଏନ୍ସର ଚେୟାରମ୍ୟାନ୍ ଏବଂ ପରିଚାଳନା ନିର୍ଦ୍ଦେଶକ ଭାବେ ସେ କାର୍ଯ୍ୟ କରୁଛନ୍ତି ।
ବିଶ୍ୱରେ କରୋନା ପ୍ରଭାବ ବିସ୍ତାର ସମୟରେ ଜୁନ୍ ୨୦୨୦ରେ ସେ ଆର୍ଥିକ ବର୍ଷ ୨୦୨୦-୨୧ ବର୍ଷ ପାଇଁ ଏକ ଟଙ୍କା ଦରମା ନେବେ ନାହିଁ ବୋଲି ଘୋଷଣା କରିଥିଲେ । ତେବେ ଚଳିତ ଆର୍ଥିକ ବର୍ଷ ୨୦୨୧-୨୨ ପାଇଁ ମଧ୍ୟ ସେ ବିନା ଦରମାରେ କାମ କରିବା ନେଇ କହିଛନ୍ତି । ଗତବର୍ଷ ମଧ୍ୟରେ ସେ କୌଣସି ଭତ୍ତା, ଅବସର କାଳୀନ ଭତ୍ତା, ଅନ୍ୟାନ୍ୟ ସୁବିଧା ସୁଯୋଗ ନେଇନଥିବା ବେଳେ ଚଳିତ ବର୍ଷ ମଧ୍ୟ କୌଣସି ସୁବିଧା ସୁଯୋଗ କମ୍ପାନୀଠାରୁ ନେବେ ନାହିଁ । ୨୦୦୮-୦୯ ମସିହାରେ ମୁକେଶ୍ ଅମ୍ୱାନୀ ୧୫ କୋଟି ଟଙ୍କା ଦରମା ନେଉଥିବା ବେଳେ ୨୦୧୯-୨୦ ରେ ମଧ୍ୟ ସେ ସମାନ ଦରମା ନେଉଥିଲେ । ଏହାରି ସହ ଅନ୍ୟାନ୍ୟ ସୁବିଧା ମିଶାଇ ୨୪ କୋଟି ଟଙ୍କା ପ୍ରତିବର୍ଷ ସେ ନେଉଥିବା ଜଣାପଡ଼ିଥିବା ବେଳେ ଦୁଇ ବର୍ଷ ପାଇଁ ଏହି ଟଙ୍କା କମ୍ପାନୀଠାରୁ ନେବେ ନାହିଁ ।
