ନୂଆଦିଲ୍ଲୀ, ୨୧।୪: ପଶ୍ଚିମ ଏସିଆର ତନାବପୂର୍ଣ୍ଣ ପରିସ୍ଥିତିକୁ ନେଇ ପେଟ୍ରୋଲ, ଡିଜେଲ ଓ ରୋଷେଇ ଗ୍ୟାସ ଦାମ ବଢ଼ିବା ନେଇ ଲୋକମାନଙ୍କ ମଧ୍ୟରେ ଆଶଙ୍କା ବଢ଼ୁଥିବା ବେଳେ କେନ୍ଦ୍ର ସରକାର ଆଶ୍ୱାସନ ଦେଇଛନ୍ତି ଯେ ଦେଶରେ ଗ୍ୟାସ ଯୋଗାଣ ଓ ଘରୋଇ ବଜେଟ ଉପରେ କୌଣସି ପ୍ରଭାବ ପଡ଼ିବ ନାହିଁ।
ଦିଲ୍ଲୀରେ ହୋଇଥିବା ଉଚ୍ଚସ୍ତରୀୟ ବୈଠକରେ ସୁଜାତା ଶର୍ମା କହିଛନ୍ତି ଯେ ଦେଶରେ ଘରୋଇ LPG ଉତ୍ପାଦନକୁ ବୃଦ୍ଧି କରାଯାଇଛି, ଯାହା ଦ୍ୱାରା ବିଦେଶୀ ସଙ୍କଟର ପ୍ରଭାବ ସାଧାରଣ ଲୋକଙ୍କ ପକେଟ ଉପରେ ପଡ଼ିବ ନାହିଁ। ସେ କହିଛନ୍ତି ଯେ ଗ୍ୟାସ ବୁକିଂର ସମୟସୀମାକୁ ମଧ୍ୟ ବଢ଼ାଯାଇଛି, ଫଳରେ ଗ୍ରାହକମାନେ ସହଜରେ ସିଲିଣ୍ଡର ପାଇପାରିବେ। ସରକାରଙ୍କ ଅନୁସାରେ, ଦେଶର କୌଣସି ଗ୍ୟାସ ଏଜେନ୍ସିରେ ଷ୍ଟକ ଅଭାବ ନାହିଁ ଏବଂ ଯୋଗାଣ ସମ୍ପୂର୍ଣ୍ଣ ସ୍ଥିର ଅଛି।
ଗ୍ୟାସ କଳାବଜାରୀକୁ ରୋକିବା ପାଇଁ ଡେଲିଭରି ଅଥେଣ୍ଟିକେସନ କୋଡ (DAC) ବ୍ୟବସ୍ଥାକୁ କଡ଼ାକଡ଼ି ଲାଗୁ କରାଯାଇଛି। ସୁଜାତା ଶର୍ମା କହିଛନ୍ତି ଯେ DAC ବ୍ୟବହାର ୯୦ ପ୍ରତିଶତ ଲକ୍ଷ୍ୟକୁ ଅତିକ୍ରମ କରି ୯୨ ପ୍ରତିଶତରେ ପହଞ୍ଚିଛି, ଯାହା ଦ୍ୱାରା ସଠିକ ଗ୍ରାହକଙ୍କ ପାଖକୁ ସିଧାସଳଖ ଗ୍ୟାସ ପହଞ୍ଚୁଛି।
ବାଣିଜ୍ୟିକ ଗ୍ୟାସ ଯୋଗାଣ ମଧ୍ୟ ୭୦ ପ୍ରତିଶତ କ୍ଷମତାକୁ ଫେରିଥିବା ବେଳେ ୫ କିଲୋଗ୍ରାମର ଛୋଟ ସିଲିଣ୍ଡର ଚାହିଦା ବୃଦ୍ଧି ପାଇଛି।
ଏହି ସମୟରେ ସମୁଦ୍ର ପଥରେ ଆସୁଥିବା ତୈଳ ଓ ଗ୍ୟାସ ଯୋଗାଣକୁ ନେଇ ମଧ୍ୟ ସରକାର ସଚେତନ ଅଛନ୍ତି। ଜାହାଜ ଚଳାଚଳ ବିଭାଗର ଅଧିକାରୀ ମନଦୀପ ସିଂହ ରନ୍ଧାୱା କହିଛନ୍ତି ଯେ ୯୭,୦୦୦ ମେଟ୍ରିକ ଟନ ଅଶୋଧିତ ତୈଳ ବହନ କରୁଥିବା ଭାରତୀୟ ଜାହାଜ “ଦେଶ ଗରିମା” ସୁରକ୍ଷିତ ଭାବେ ହର୍ମୁଜ ପ୍ରଣାଳୀ ଅତିକ୍ରମ କରିଛି।
ଗତ ୪୮ ଘଣ୍ଟାରେ କିଛି ଗୁଳି ବିନିମୟ ଘଟଣା ସତ୍ତ୍ୱେ “ସନମାର ହେରାଲ୍ଡ” ଓ “ଜଗ ଅର୍ଣ୍ଣଭ” ପରି ଭାରତୀୟ ଜାହାଜଗୁଡ଼ିକ ସୁରକ୍ଷିତ ରହିଥିବା ଓ କୌଣସି କ୍ରୁ ସଦସ୍ୟ ଆହତ ହୋଇନଥିବା ସୂଚନା ମିଳିଛି। ସରକାରଙ୍କ ଏହି ଆଶ୍ୱାସନ ମଧ୍ୟରେ ସାଧାରଣ ଲୋକଙ୍କ ଚିନ୍ତା କିଛିହେଲେ ହ୍ରାସ ପାଇଛି।
