ମଙ୍ଗଳବାର: କେଦାରନାଥ ମନ୍ଦିର ପରିସରରେ ମୋବାଇଲ୍ ଫୋନ୍ ବ୍ୟବହାର ଉପରେ ସମ୍ପୂର୍ଣ୍ଣ ନିଷେଧ ଜାରି କରାଯାଇଛି। ମନ୍ଦିରର ପବିତ୍ରତା ଓ ଆଧ୍ୟାତ୍ମିକ ପରିବେଶକୁ ଅକ୍ଷୁଣ୍ଣ ରଖିବା ସହିତ ଭକ୍ତମାନଙ୍କୁ ଶାନ୍ତିପୂର୍ଣ୍ଣ ଭାବରେ ଦର୍ଶନ କରିବାର ସୁବିଧା ଦେବାକୁ ଏହି ନିଷ୍ପତ୍ତି ନିଆଯାଇଛି।
ନୂତନ ନିୟମ ଅନୁଯାୟୀ, କେଦାରନାଥ ମନ୍ଦିର ପରିସରକୁ ମୋବାଇଲ୍ ଫୋନ୍ ନେବା, ଫଟୋ ତୋଳିବା, ଭିଡିଓ କରିବା କିମ୍ବା ସୋସିଆଲ ମିଡିଆ ପାଇଁ ରିଲ୍ ତିଆରି କରିବାକୁ ସଂପୂର୍ଣ୍ଣ ଭାବେ ନିଷେଧ କରାଯାଇଛି। ମନ୍ଦିର ପ୍ରଶାସନ ସ୍ପଷ୍ଟ କରିଛି ଯେ ଯେକୌଣସି ଭକ୍ତ ଏହି ନିୟମ ଭଙ୍ଗ କଲେ ତାଙ୍କ ବିରୋଧରେ ଆଇନ ଅନୁଯାୟୀ କଠୋର ପଦକ୍ଷେପ ଗ୍ରହଣ କରାଯିବ।
ମନ୍ଦିର କମିଟି ପକ୍ଷରୁ କୁହାଯାଇଛି ଯେ ଶେଷ କିଛି ଦିନ ଧରି କିଛି ଭକ୍ତ ମନ୍ଦିର ପରିସରରେ ଭିଡିଓ ଓ ଫଟୋ ତୋଳିବାରେ ବ୍ୟସ୍ତ ରହୁଥିବାରୁ ଅନ୍ୟ ଭକ୍ତମାନଙ୍କ ଦର୍ଶନରେ ବାଧା ସୃଷ୍ଟି ହେଉଥିଲା। ଏହା ସହ ମନ୍ଦିରର ଶାନ୍ତ ପରିବେଶ ମଧ୍ୟ ବିଘ୍ନିତ ହେଉଥିଲା। ଏହି ପରିସ୍ଥିତିକୁ ଦୃଷ୍ଟିରେ ରଖି ଏହି କଠୋର ନିଷେଧ ଲାଗୁ କରାଯାଇଛି।
ଏହା ସହିତ, ଆଗାମୀ କେଦାରନାଥ ଯାତ୍ରାକୁ ମନେରଖି ସ୍ଥାନୀୟ ପୁଲିସ ଓ ପ୍ରଶାସନ ପକ୍ଷରୁ ବିଶେଷ ପ୍ରସ୍ତୁତି କରାଯାଇଛି। ଭକ୍ତମାନଙ୍କ ସୁରକ୍ଷିତ ଓ ସୁଗମ ଯାତ୍ରା ପାଇଁ ବ୍ୟାପକ ଟ୍ରାଫିକ୍ ପରିଚାଳନା ଯୋଜନା ତିଆରି ହୋଇଛି। ଏଥିରେ ରାସ୍ତାରେ ଭିଡ଼ ନିୟନ୍ତ୍ରଣ, ଯାନବାହନ ଚଳାଚଳ ସୁବିଧା ଓ ଯାତ୍ରୀମାନଙ୍କ ଗତିବିଧିକୁ ସଠିକ ଭାବେ ବ୍ୟବସ୍ଥାପନ କରିବାକୁ ବିଶେଷ ଜୋର ଦିଆଯାଇଛି।
ପୁଲିସ ପକ୍ଷରୁ କୁହାଯାଇଛି ଯେ ଯାତ୍ରା ସମୟରେ ଭକ୍ତମାନଙ୍କ ସୁରକ୍ଷା ସର୍ବୋପରି ରହିବ ଏବଂ ଏହା ପାଇଁ ଅଧିକ ସଂଖ୍ୟାରେ ସୁରକ୍ଷା ବଳ ମୁତାୟନ କରାଯିବ। ସେଥିପାଇଁ ସମସ୍ତ ଭକ୍ତଙ୍କୁ ନିୟମ ମାନିବା ଓ ପ୍ରଶାସନଙ୍କ ସହଯୋଗ କରିବାକୁ ଅନୁରୋଧ କରାଯାଇଛି, ଯାହା ଫଳରେ ସମସ୍ତେ ଶାନ୍ତିପୂର୍ଣ୍ଣ ଓ ଆଧ୍ୟାତ୍ମିକ ପରିବେଶରେ ଦର୍ଶନ କରିପାରିବେ।
