ନୂଆଦିଲ୍ଲୀ: ଦିଲ୍ଲୀ ପୁଲିସ ପାକିସ୍ତାନର ଗୁପ୍ତଚର ସଂଗଠନ ଆଇଏସଆଇ ସହ ସମ୍ପର୍କ ଥିବା ଅଭିଯୋଗରେ ଦୁଇଜଣ ଯୁବକଙ୍କୁ ଗିରଫ କରିଛି। ଗିରଫ ସନ୍ଦିଗ୍ଧ ହେଲେ ଦିଲ୍ଲୀ-ଏନସିଆର ଅଞ୍ଚଳର ରାଜବୀର ଓ ବିବେକ ଭଞ୍ଜାରା। ପୁଲିସ ଅନୁସାରେ, ଏମାନଙ୍କର ଆଇଏସଆଇ ସଂପୃକ୍ତ ଆତଙ୍କୀ ପ୍ରକ୍ସି ସହଜାଦ ଭାଟି ସହ ସମ୍ପର୍କ ଥିଲା ଏବଂ ସେମାନେ ଦିଲ୍ଲୀ-ଏନସିଆରରେ ଟାର୍ଗେଟ କିଲିଂ ଓ ଗୁଳିକାଣ୍ଡ ଯୋଜନାରେ ସାମିଲ ଥିଲେ।
ଦିଲ୍ଲୀ ପୁଲିସର ସ୍ପେଶାଲ ସେଲ୍କୁ ମିଳିଥିବା ଗୁପ୍ତ ସୂଚନା ଅନୁଯାୟୀ, ଆଇଏସଆଇ ସଂପୃକ୍ତ ନେଟୱର୍କ ଦ୍ୱାରା ଗ୍ରେନେଡ୍ ଆକ୍ରମଣ ଓ ଟାର୍ଗେଟ ହତ୍ୟାର ଯୋଜନା କରାଯାଉଥିଲା। ଏହା ପରେ କାର୍ଯ୍ୟାନୁଷ୍ଠାନ ନେଇ ପୁଲିସ ପ୍ରଥମେ ବିବେକ ଭଞ୍ଜାରାଙ୍କୁ ଏପ୍ରିଲ ୧୬ରେ ମଧ୍ୟପ୍ରଦେଶର ଡାବ୍ରା ଅଞ୍ଚଳରୁ ଗିରଫ କରିଥିଲା। ପରେ ପଚରାଉଚରା ଆଧାରରେ ମୁଖ୍ୟ ଅଭିଯୁକ୍ତ ରାଜବୀରକୁ ଏପ୍ରିଲ ୧୮ରେ ଗିରଫ କରାଯାଇଥିଲା।
ତଦନ୍ତରେ ଜଣାପଡ଼ିଛି ଯେ ଗିରଫ ସମୟରେ ରାଜବୀର ଦିଲ୍ଲୀ-ଏନସିଆରର ଏକ ପ୍ରମୁଖ ହୋଟେଲରେ ଗୁଳିକାଣ୍ଡ ପାଇଁ ପ୍ରସ୍ତୁତି ନେଉଥିଲେ। ସେମାନଙ୍କ ନିକଟରୁ ଗୋଟିଏ ପିସ୍ତଲ, ଛଅ ରାଉଣ୍ଡ ଗୁଳି ଓ ଅପରାଧ ସମ୍ପର୍କିତ ଭିଡିଓ ଓ ଭଏସ୍ ନୋଟ୍ ଥିବା ଦୁଇଟି ମୋବାଇଲ୍ ଫୋନ୍ ଜବତ କରାଯାଇଛି।
ପୁଲିସ ସୂଚନା ଅନୁଯାୟୀ, ସୋସିଆଲ ମିଡିଆ ମାଧ୍ୟମରେ ‘ରାଣା ଭାଇ’ ନାମକ ଏକ ସହଯୋଗୀ ଦ୍ୱାରା ରାଜବୀରଙ୍କୁ ନିଯୁକ୍ତ କରାଯାଇଥିଲା ଏବଂ ସେ ବିବେକଙ୍କୁ ଏହି ନେଟୱର୍କ ସହ ପରିଚୟ କରାଇଥିଲେ। ମାର୍ଚ୍ଚ ୨୦୨୬ରେ ଭାଟିଙ୍କ ନିର୍ଦ୍ଦେଶରେ ବିବେକଙ୍କୁ ଅହମ୍ମଦାବାଦରେକୁ ଅସ୍ତ୍ର କିଣିବା ପାଇଁ ପଠାଯାଇଥିଲା, କିନ୍ତୁ ସେଥିରେ ବିଫଳ ହୋଇଥିଲେ।
ପରବର୍ତ୍ତୀ ସମୟରେ ଏପ୍ରିଲ ୯ରେ ଦୁଇଜଣ ଅମୃତସର ଯାଇଥିଲେ, ଯେଉଁଠାରୁ ସେମାନେ ଏକ ପିସ୍ତଲ, ୧୫-୨୦ ରାଉଣ୍ଡ ଗୁଳି ଓ ୨୦ ହଜାର ଟଙ୍କା ପାଇଥିଲେ। ଏହି ଅସ୍ତ୍ର ଦ୍ୱାରା ଜିରକପୁରର ଏକ କ୍ଲବ ଉପରେ ଆକ୍ରମଣ ଯୋଜନା ଥିଲା। ହେଲେ ପିସ୍ତଲର ଯାନ୍ତ୍ରିକ ତ୍ରୁଟି କାରଣରୁ ଏପ୍ରିଲ ୧୧ରେ ଗୁଳିଚାଳନା ବିଫଳ ହୋଇଥିଲା।
ବିବେକ ଏହି ବିଫଳ ଚେଷ୍ଟାର ଭିଡିଓ ରେକର୍ଡ କରି ସହଜାଦ ଭାଟିଙ୍କୁ ପଠାଇଥିବା ପୁଲିସ କହିଛି। ବର୍ତ୍ତମାନ ଏହି ଘଟଣାର ଅଧିକ ତଦନ୍ତ ଚାଲିଛି ଏବଂ ଅନ୍ୟ ଯୋଗାଯୋଗ ଲିଙ୍କ ଖୋଜାଯାଉଛି।
