ଭବାନୀପାଟଣାରେ ଓଡ଼ିଶା ଜନତା କଂଗ୍ରେସର ବିଶାଳ ସମାବେଶରେ ଦଳ ସଭାପତି ମହମ୍ମଦ ମୋକିମ ତିନି ପ୍ରମୁଖ ଦଳ କଂଗ୍ରେସ, ବିଜେଡି ଓ ବିଜେପିକୁ କଡ଼ା ସମାଲୋଚନା କରିଛନ୍ତି। ସେ କହିଛନ୍ତି ଯେ, ଗତ ୩୦ ବର୍ଷ ଧରି କଳାହାଣ୍ଡି ରାଜନୈତିକ ଅବହେଳାର ଶିକାର ହୋଇଛି ଏବଂ ଏଥିପାଇଁ ଏହି ତିନି ଦଳ ଦାୟୀ। ନିର୍ବାଚନ ପରେ ନେତାମାନେ ଲୋକଙ୍କ ସମସ୍ୟା ଭୁଲି ଯାଉଥିବା ଅଭିଯୋଗ କରି ସେ କହିଛନ୍ତି ଯେ, ଓଡ଼ିଶା ଜନତା କଂଗ୍ରେସ କଳାହାଣ୍ଡିବାସୀଙ୍କ ସ୍ୱର ହେବ।
ମୋକିମ ସିଜିମାଳି ଅଞ୍ଚଳରେ ପୁଲିସ ଆକ୍ରମଣକୁ ନେଇ ସରକାରକୁ ଟାର୍ଗେଟ୍ କରିଥିବାବେଳେ କଳାହାଣ୍ଡିର ଖଣି ସମ୍ପଦ ଲୁଟ୍କୁ ବିରୋଧ କରିବାକୁ ଦଳ ପ୍ରତିଶ୍ରୁତି ଦେଇଛି। ଜିଲ୍ଲାର ବେକାର ଯୁବକଙ୍କୁ ନିଯୁକ୍ତି ଏବଂ ଚାଷୀଙ୍କୁ ଶୋଷଣରୁ ରକ୍ଷା କରିବା ଦଳର ମୂଳ ଲକ୍ଷ୍ୟ ବୋଲି ସେ କହିଛନ୍ତି।
ବେଦାନ୍ତ ଓ ଉତ୍କଳ ଆଲୁମିନା ଭଳି କମ୍ପାନୀ କଳାହାଣ୍ଡିର କେତେ ଯୁବକଙ୍କୁ ସିଧାସଳଖ ନିଯୁକ୍ତି ଦେଇଛି ବୋଲି ପ୍ରଶ୍ନ ଉଠାଇ ମୋକିମ ଶିଳ୍ପ ସଂସ୍ଥାଗୁଡ଼ିକୁ ମଧ୍ୟ ଘେରିଥିଲେ। ପିସିସି ସଭାପତି ଭକ୍ତଚରଣ ଦାସଙ୍କୁ ଚ୍ୟାଲେଞ୍ଜ ଦେବାକୁ ଏହି ସମାବେଶ କରାଯାଇଛି କି ବୋଲି ପ୍ରଶ୍ନରେ ସେ ସିଧାସଳଖ ଉତ୍ତର ଦେଇନଥିଲେ, କିନ୍ତୁ “ମୁଁ ଗଡ଼ରେ ବିଶ୍ୱାସ କରେନି” ବୋଲି କହିଥିଲେ।
ମଧୁ ମହାନ୍ତିଙ୍କ ଅଧ୍ୟକ୍ଷତାରେ ହୋଇଥିବା ଏହି ସଭାରେ ପ୍ରାୟ ୮ ହଜାରରୁ ଅଧିକ ଲୋକ ଯୋଗଦେଇଥିବା ଦାବି କରାଯାଇଛି। ଭବାନୀପାଟଣା ବ୍ଲକରେ କଂଗ୍ରେସର ବନ୍ଦ ଡାକରା ସତ୍ତ୍ୱେ ଏତେ ବଡ଼ ସମାଗମ ରାଜନୈତିକ ମହଳରେ ଚର୍ଚ୍ଚା ସୃଷ୍ଟି କରିଛି।
