ଗଞ୍ଜାମ ଜିଲା: ପ୍ଲଟ ବ୍ୟବସାୟୀ ସୁଧୀର ପାତ୍ରଙ୍କ ଅପହରଣ ଓ ହତ୍ୟା ଘଟଣାରେ ପୁଲିସ ବଡ଼ ସଫଳତା ପାଇଛି। ଏହି ଚର୍ଚ୍ଚିତ ଘଟଣାର ପର୍ଦ୍ଦାଫାସ୍ କରି ପୁଲିସ ମୋଟ ୯ ଜଣଙ୍କୁ ଗିରଫ କରିଥିବା ସୂଚନା ଦେଇଛନ୍ତି ଏସ୍ପି।
ତଦନ୍ତରେ ଚମତ୍କାରକ ତଥ୍ୟ ସାମ୍ନାକୁ ଆସିଛି, ଯେଉଁଠାରେ ହତ୍ୟାକାଣ୍ଡ ପଛରେ ପରିବାର ଲୋକଙ୍କ ସଂପୃକ୍ତି ଥିବା ପ୍ରମାଣିତ ହୋଇଛି। ବ୍ୟବସାୟୀଙ୍କ ଝିଆରୀ ନିବେଦିତା ପାତ୍ରଙ୍କୁ ମୁଖ୍ୟ ଅଭିଯୁକ୍ତ ଭାବେ ଚିହ୍ନଟ କରାଯାଇଛି। ତାଙ୍କ ପ୍ରେମିକ କାଳୁ ପ୍ରଧାନ ଏହି ଅପରାଧର ଯୋଜନା କରିଥିବାବେଳେ, ନିବେଦିତାଙ୍କ ଭାଇ ତୁଷାର ପାତ୍ର ମଧ୍ୟ ଷଡ଼ଯନ୍ତ୍ରରେ ସାମିଲ ଥିବା ଜଣାପଡ଼ିଛି।
ପୁଲିସ ଗିରଫ କରିଥିବା ଅନ୍ୟ ଅଭିଯୁକ୍ତମାନେ ହେଲେ ଆଶିଷ ମହାପାତ୍ର, ନାରାୟଣ ପ୍ରଧାନ, ଶୁଭମ ନାୟକ, ଶୁଭମ ଗୌଡ଼, ସୂର୍ଯ୍ୟ ପ୍ରତାପ ସିଂ ଓ ଜିତୁନ୍ ପଳେଇ। ଏହି ସମସ୍ତେ ମିଶି ବ୍ୟବସାୟୀଙ୍କୁ ଅପହରଣ କରି ନିର୍ମମ ଭାବେ ପିଟି ପିଟି ହତ୍ୟା କରିଥିବା ପୁଲିସ କହିଛି। ପରେ ମୃତଦେହକୁ ଫିଙ୍ଗି ଦିଆଯାଇଥିଲା।
ଦକ୍ଷିଣାଞ୍ଚଳ ଆଇଜି ନୀତି ଶେଖର କହିଛନ୍ତି ଯେ, ଏହି ମାମଲାରେ ଆହୁରି କିଛି ଅଭିଯୁକ୍ତ ଫେରାର ଅବସ୍ଥାରେ ଅଛନ୍ତି ଏବଂ ସେମାନଙ୍କୁ ଧରିବା ପାଇଁ ପୁଲିସ ତଲାଶ ଜାରି ରଖିଛି।
ଏହି ଘଟଣା ଜିଲ୍ଲାରେ ଚର୍ଚ୍ଚା ସୃଷ୍ଟି କରିଥିବାବେଳେ, ପରିବାର ମଧ୍ୟରୁ ଏପରି ଷଡ଼ଯନ୍ତ୍ର ଓ ହତ୍ୟା ଘଟିବା ନେଇ ସ୍ଥାନୀୟ ଲୋକମାନଙ୍କ ମଧ୍ୟରେ ଚମକ ସୃଷ୍ଟି ହୋଇଛି।
