ବେଙ୍ଗାଲୁରୁ, ୧୦ ମଇ – କଂଗ୍ରେସ କେବଳ ମିଥ୍ୟା ଏବଂ ବିଶ୍ୱାସଘାତର ରାଜନୀତି କରେ। କଂଗ୍ରେସର କ୍ଷମତାର ପୁସ୍ତକରେ ଶାସନ ବ୍ୟବସ୍ଥାର କୌଣସି ଅଧ୍ୟାୟ ନାହିଁ। ଦେଶର ଜନସାଧାରଣ ସ୍ଥିରତା, ବିକାଶ ଏବଂ ରାଷ୍ଟ୍ରନୀତି ସହିତ ଅତୁଟ ଭାବେ ଦଣ୍ଡାୟମାନ ଅଛନ୍ତି ଏବଂ ଏହି କାରଣରୁ ଭାରତୀୟ ଜନତା ପାର୍ଟି (ଭାଜପା) ଏବଂ ଏନଡିଏକୁ ଲଗାତାର ଜନସମର୍ଥନ ମିଳୁଛିବୋଲି ପ୍ରଧାନମନ୍ତ୍ରୀ କହିଛନ୍ତି ।
ପ୍ରଧାନମନ୍ତ୍ରୀ କର୍ଣ୍ଣାଟକର ବେଙ୍ଗାଲୁରୁରେ ଏକ ଜନସଭାରେ ଏହା କହିଛନ୍ତି । ନରେନ୍ଦ୍ର ମୋଦି କହିଛନ୍ତି ଯେ, କଂଗ୍ରେସ ନିଜେ ମିଥ୍ୟା ଏବଂ ତାହାର ଗ୍ୟାରେଣ୍ଟିମାନେ ମଧ୍ୟ ମିଥ୍ୟା। ସେ ଅଭିଯୋଗ କରିଛନ୍ତି ଯେ, କର୍ଣ୍ଣାଟକରେ ଗତ ତିନି ବର୍ଷ ଧରି ଜନସାଧାରଣଙ୍କ ସମସ୍ୟା ସମାଧାନ କରିବା ପରିବର୍ତ୍ତେ ସରକାରର ଅଧିକାଂଶ ସମୟ ଆନ୍ତରିକ କଳହରେ କଟୁଛି। ସେ କହିଛନ୍ତି ଯେ, ରାଜ୍ୟରେ ମୁଖ୍ୟମନ୍ତ୍ରୀ କେତେଦିନ ରହିବେ ଏବଂ କାହାକୁ ସୁଯୋଗ ମିଳିବ, ତାହା ମଧ୍ୟ ନିର୍ଦ୍ଧାରିତ ହୋଇପାରୁନାହିଁ।
ପ୍ରଧାନମନ୍ତ୍ରୀ କଂଗ୍ରେସକୁ “ପରଜୀବୀ ଦଳ” ବୋଲି କହିଛନ୍ତି ଏବଂ କହିଛନ୍ତି ଯେ, ସେ ନିଜ ସହଯୋଗୀମାନଙ୍କ ସହିତ ମଧ୍ୟ ବିଶ୍ୱାସଘାତ କରେ। ସେ ତାମିଳନାଡୁରେ କଂଗ୍ରେସ ଏବଂ ଏମକେ ଷ୍ଟାଲିନ ନେତୃତ୍ୱାଧୀନ ଦ୍ରାବିଡ ମୁନେତ୍ର କଝଗମ (ଡିଏମକେ) ସମ୍ପର୍କର ଉଲ୍ଲେଖ କରି କହିଥିଲେ ଯେ, ବର୍ଷ ପୁରୁଣା ମେଂଟ ଥିବା ସତ୍ତ୍ୱେ କଂଗ୍ରେସ କ୍ଷମତାଲୋଭରେ ନିଜ ସହଯୋଗୀଙ୍କ “ପିଠିରେ ଛୁରୀ ଭୁସିଛି”।
ନରେନ୍ଦ୍ର ମୋଦି କହିଛନ୍ତି ଯେ, ବିଜେପି ସରକାରମାନଙ୍କ ପାଇଁ ଲୋକକଲ୍ୟାଣ ସର୍ବୋପରି ଏବଂ ତାଙ୍କର ମନ୍ତ୍ର “ସମସ୍ତଙ୍କ ସହ, ସମସ୍ତଙ୍କ ବିକାଶ”। ସେ କହିଛନ୍ତି ଯେ, ବିଜେପିର ମଡେଲ ସୁଶାସନର ମଡେଲ, ଏହି କାରଣରୁ ଜନସାଧାରଣ ବିଭିନ୍ନ ରାଜ୍ୟରେ ବିଜେପିକୁ ଦ୍ୱିତୀୟ ଏବଂ ତୃତୀୟଥର ପାଇଁ ସେବାର ସୁଯୋଗ ଦେଉଛନ୍ତି, ଯେଉଁଠାରେ କଂଗ୍ରେସର ରାଜ୍ୟ ସରକାରମାନେ ପୁନର୍ବାର କ୍ଷମତାକୁ ଫେରିବାରେ ବିଫଳ ହୋଇଛନ୍ତି।
ପ୍ରଧାନମନ୍ତ୍ରୀ କହିଛନ୍ତି ଯେ, ଗତ ୧୨ ବର୍ଷ ଧରି କେନ୍ଦ୍ରରେ ଏନଡିଏ ସରକାର ଅଛି ଏବଂ ଦେଶର ୨୧ରୁ ଅଧିକ ରାଜ୍ୟରେ ବିଜେପି କିମ୍ବା ଏନଡିଏ ସରକାର ବିକାଶର ମନ୍ତ୍ର ସହ କାମ କରୁଛନ୍ତି। ସେ କଂଗ୍ରେସ ଉପରେ ଗଣତାନ୍ତ୍ରିକ ସଂସ୍ଥା, ସଂବିଧାନିକ ପ୍ରକ୍ରିୟା ଏବଂ ନ୍ୟାୟପାଳିକା ପ୍ରତି ଘୃଣା ପ୍ରଚାର କରୁଥିବା ଅଭିଯୋଗ ଆଣିଥିଲେ। ନରେନ୍ଦ୍ର ମୋଦି କହିଛନ୍ତି ଯେ, କଂଗ୍ରେସ ଏତେ ନିରାଶାରେ ବୁଡିଯାଇଛି ଯେ, ତାହା ପାଖରେ ଗାଳିଗୁଲଜ ଏବଂ ଅଶ୍ଳୀଳ ଭାଷା ବ୍ୟତୀତ ଆଉ କୌଣସି ଏଜେଣ୍ଡା ନାହିଁ।
