କେନ୍ଦ୍ରମନ୍ତ୍ରୀ ନୀତିନ ଗଡକରୀଙ୍କ ଏକ ମନ୍ତବ୍ୟକୁ ନେଇ ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି। ନାଗପୁର ଜିଲା କାଟୋଲ ଅଞ୍ଚଳର ପାରାଡସିଙ୍ଗାରେ ଏକଲବ୍ୟ ଏକଲ ବିଦ୍ୟାଳୟର ଶିକ୍ଷକ ଓ ପର୍ଯ୍ୟବେକ୍ଷକଙ୍କ ପ୍ରଶିକ୍ଷଣ କାର୍ଯ୍ୟକ୍ରମରେ ଯୋଗଦେଇ ଗଡକରୀ କହିଛନ୍ତି ଯେ ପ୍ରାୟ ୩୦ ବର୍ଷ ଧରି ସେ ସାର୍ବଜନୀନ ଜୀବନରେ ସକ୍ରିୟ ରହିଛନ୍ତି। ଏବେ ଆଉ ଅଧିକ କାର୍ଯ୍ୟଭାର ସମ୍ଭାଳିବା ତାଙ୍କ ପକ୍ଷେ ସମ୍ଭବ ନୁହେଁ ଏବଂ ନୂଆ ପିଢ଼ିକୁ ଦାୟିତ୍ୱ ଦେବାର ସମୟ ଆସିଛି ବୋଲି ସେ ମତ ଦେଇଛନ୍ତି।
ଗଡକରୀଙ୍କ ଏହି ମନ୍ତବ୍ୟ ଏପରି ସମୟରେ ଆସିଛି, ଯେତେବେଳେ ମନ୍ତ୍ରିମଣ୍ଡଳର ସମ୍ଭାବ୍ୟ ପୁନର୍ଗଠନକୁ ନେଇ ଚର୍ଚ୍ଚା ଚାଲିଛି। ତେବେ ସେ ରାଜନୀତିରୁ ଅବସର ନେବେ କିମ୍ବା ମନ୍ତ୍ରୀ ପଦ ଛାଡ଼ିବେ ବୋଲି କୌଣସି ସ୍ପଷ୍ଟ ଘୋଷଣା କରିନାହାନ୍ତି। ତାଙ୍କ ବକ୍ତବ୍ୟକୁ ନୂଆ ପିଢ଼ିକୁ ନେତୃତ୍ୱର ସୁଯୋଗ ଦେବା ନେଇ ତାଙ୍କ ଦୀର୍ଘଦିନର ମତର ପୁନରାବୃତ୍ତି ଭାବେ ମଧ୍ୟ ଦେଖାଯାଉଛି।
କାର୍ଯ୍ୟକ୍ରମରେ ଗଡକରୀ ନିଜ ସ୍ୱାସ୍ଥ୍ୟ ଓ ଜୀବନଶୈଳୀ ନେଇ ମଧ୍ୟ ଆଲୋଚନା କରିଥିଲେ। କୋଭିଡ୍-୧୯ ପରେ ସେ ନିଜ ଜୀବନଶୈଳୀରେ ପରିବର୍ତ୍ତନ ଆଣିଥିବା ଏବଂ ପ୍ରତିଦିନ ଯୋଗ ଅଭ୍ୟାସ କରୁଥିବା କହିଥିଲେ। ତାଙ୍କ ମତରେ, ସ୍ୱାସ୍ଥ୍ୟ ଠିକ୍ ନଥିଲେ କ୍ଷମତା ଓ ସମ୍ପତ୍ତିର କୌଣସି ଅର୍ଥ ରହେନାହିଁ।
ଏହାସହ ମହାରାଷ୍ଟ୍ରର ଆଦିବାସୀ ଅଞ୍ଚଳର ବିକାଶ ଉପରେ ମଧ୍ୟ ସେ ଗୁରୁତ୍ୱ ଦେଇଥିଲେ। ରାଜ୍ୟର କୌଣସି ଆଦିବାସୀ ଗାଁ ବିଦ୍ୟୁତ ସୁବିଧାରୁ ବଞ୍ଚିତ ନ ରହୁ ଏବଂ ବିକାଶର ଲାଭ ସବୁ ଅଞ୍ଚଳରେ ପହଞ୍ଚୁ ଏହା ତାଙ୍କର ଲକ୍ଷ୍ୟ ବୋଲି ଗଡକରୀ କହିଥିଲେ। ଗଡକରୀଙ୍କ ଏହି ବୟାନ ମଧ୍ୟରେ ନେତୃତ୍ୱରେ ପିଢ଼ିଗତ ପରିବର୍ତ୍ତନକୁ ନେଇ ଚର୍ଚ୍ଚା ଆହୁରି ତୀବ୍ର ହୋଇଛି।
