ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ବୁଧବାର ବଡ଼ ଘୋଷଣା କରିଛନ୍ତି। ଦୁଇଟି ବିଧାନସଭା ଆସନରୁ ବିଜୟୀ ହୋଇଥିବା ଶୁଭେନ୍ଦୁ କହିଛନ୍ତି ଯେ ସେ ଭବାନୀପୁର ଆସନ ରଖିବେ ଏବଂ ନନ୍ଦିଗ୍ରାମ ଆସନ ଛାଡ଼ିବେ।
ସେ କହିଛନ୍ତି, “ମୁଁ ଦୁଇଟି ବିଧାନସଭା ଆସନର ବିଧାୟକ ଭାବେ ରହିପାରିବି ନାହିଁ। ମୁଁ ଭବାନୀପୁରର ବିଧାୟକ ଭାବେ ଶପଥ ନେଇଛି ଏବଂ ନନ୍ଦିଗ୍ରାମ ଆସନ ଛାଡ଼ିବି।”
ନିକଟରେ ଶେଷ ହୋଇଥିବା ବେଙ୍ଗଲ ବିଧାନସଭା ନିର୍ବାଚନରେ ଶୁଭେନ୍ଦୁ ଭବାନୀପୁର ଓ ନନ୍ଦିଗ୍ରାମ—ଉଭୟ ଆସନରୁ ବିଜୟୀ ହୋଇଥିଲେ। ବୁଧବାର ସେ କେବଳ ଭବାନୀପୁର ଆସନର ବିଧାୟକ ଭାବେ ଶପଥ ନେଇଥିଲେ।
ନନ୍ଦିଗ୍ରାମ ଆସନ ଛାଡ଼ିବା ପରେ ସେଠାରେ ଉପନିର୍ବାଚନ ହେବ। ଏହା ଶୁଭେନ୍ଦୁଙ୍କ ଗଡ଼ ଭାବେ ପରିଚିତ ଥିବାରୁ ତାଙ୍କ ଘନିଷ୍ଠ ସହଯୋଗୀଙ୍କୁ ପ୍ରାର୍ଥୀ କରାଯାଇପାରେ ବୋଲି ଚର୍ଚ୍ଚା ହେଉଛି।
ଉଲ୍ଲେଖଯୋଗ୍ୟ, ଭବାନୀପୁର ଆସନକୁ ଟିଏମସି ସୁପ୍ରିମୋ ମମତା ବାନାର୍ଜୀଙ୍କ ଗଡ଼ ବୋଲି ଧରାଯାଏ। କିନ୍ତୁ ଏଥର ଶୁଭେନ୍ଦୁ ତାଙ୍କୁ ୧୫,୧୦୫ ଭୋଟରେ ପରାସ୍ତ କରିଥିଲେ। ସେହିପରି ନନ୍ଦିଗ୍ରାମରେ ମଧ୍ୟ ଟିଏମସି ପ୍ରାର୍ଥୀ ପବିତ୍ର କରଙ୍କୁ ୯,୬୬୫ ଭୋଟରେ ହରାଇଥିଲେ।
