ପଶ୍ଚିମବଙ୍ଗ ବିଧାନସଭା ନିର୍ବାଚନ ଆଗକୁ ବଢ଼ିବା ସହ ରାଜନୈତିକ ମଞ୍ଚରେ ଚର୍ଚ୍ଚା ଓ ଅଭିଯୋଗ-ପ୍ରତିଅଭିଯୋଗ ତୀବ୍ର ହୋଇପଡ଼ିଛି। ଚଳିତମାସ ୨୯ ତାରିଖରେ ଅବଶିଷ୍ଟ ୧୪୨ଟି ଆସନ ପାଇଁ ଦ୍ବିତୀୟ ପର୍ଯ୍ୟାୟର ଭୋଟଗ୍ରହଣ ହେବାକୁ ଥିବା ବେଳେ, ଏହା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କୃଷ୍ଣନଗରରେ ଏକ ବିଶାଳ ଜନସଭାକୁ ସମ୍ବୋଧନ କରି ମହିଳାଙ୍କ ପାଇଁ ୧୦ଟି ଗ୍ୟାରେଣ୍ଟି ଘୋଷଣା କରିଛନ୍ତି। ଏହି ଘୋଷଣାକୁ ନିର୍ବାଚନୀ ରଣନୀତିର ଗୁରୁତ୍ୱପୂର୍ଣ୍ଣ ଅଂଶ ବୋଲି ଦେଖାଯାଉଛି, କାରଣ ରାଜ୍ୟରେ ମହିଳା ଭୋଟରମାନେ ନିର୍ଣାୟକ ଭୂମିକା ନିଭାଇ ପାରନ୍ତି।
ସଭାରେ ମୋଦୀ କହିଥିଲେ ଯେ, ବିଜେପି ସରକାର ଗଠନ ହେଲେ ରାଜ୍ୟରେ ମହିଳା ସୁରକ୍ଷାକୁ ସର୍ବୋଚ୍ଚ ପ୍ରାଥମିକତା ଦିଆଯିବ। ମହିଳାଙ୍କ ବିରୋଧରେ ଅପରାଧ କରୁଥିବା ଅଭିଯୁକ୍ତମାନଙ୍କୁ ଶୀଘ୍ର ଓ କଠୋର ଦଣ୍ଡ ଦିଆଯିବା ସହ ଆଇନ-ଶୃଙ୍ଖଳାକୁ ସୁଦୃଢ଼ କରାଯିବ। ସେ ଘୋଷଣା କରିଥିଲେ ଯେ ପ୍ରତ୍ୟେକ ବ୍ଲକ୍ରେ ମହିଳା ଥାନା ସ୍ଥାପନ କରାଯିବ, ଯାହା ମାଧ୍ୟମରେ ମହିଳାଙ୍କୁ ସହଜରେ ନ୍ୟାୟ ମିଳିବା ସହ ପୁଲିସ ବିଭାଗରେ ମହିଳାଙ୍କ ପାଇଁ ନୂତନ ନିଯୁକ୍ତି ସୁଯୋଗ ସୃଷ୍ଟି ହେବ।
ମୋଦୀ ଆର୍ଥିକ ସଶକ୍ତିକରଣକୁ ମଧ୍ୟ ଗୁରୁତ୍ୱ ଦେଇ କହିଥିଲେ ଯେ, ସରକାର ଗଠନ ପରେ ଏକ ବର୍ଷ ମଧ୍ୟରେ ପ୍ରତ୍ୟେକ ମହିଳାଙ୍କ ବ୍ୟାଙ୍କ ଖାତାକୁ ୩୬ ହଜାର ଟଙ୍କା ପ୍ରଦାନ କରାଯିବ। ବାଳିକାଙ୍କ ଶିକ୍ଷା ପାଇଁ ୫୦ ହଜାର ଟଙ୍କା ସହାୟତା ଓ ଗର୍ଭବତୀ ମହିଳାଙ୍କୁ ୨୧ ହଜାର ଟଙ୍କା ଏକକାଳୀନ ଅର୍ଥ ସହାୟତା ଦେବାକୁ ଘୋଷଣା କରାଯାଇଛି। ଏହା ସହ ନବଜାତ ଶିଶୁର ପୋଷଣ ଓ ଯତ୍ନ ପାଇଁ ଅତିରିକ୍ତ ୩୬ ହଜାର ଟଙ୍କା ମଧ୍ୟ ଦିଆଯିବ।
ସେ ଆହୁରି କହିଥିଲେ ଯେ, ସୁକନ୍ୟା ସମୃଦ୍ଧି ଯୋଜନା ମାଧ୍ୟମରେ ଯୁବତୀମାନଙ୍କ ଭବିଷ୍ୟତକୁ ସୁରକ୍ଷିତ କରାଯିବ। ଆତ୍ମନିର୍ଭର ହେବାକୁ ଇଚ୍ଛୁକ ଯୁବତୀ ଓ ଯୁବକମାନଙ୍କୁ ମୁଦ୍ରା ଯୋଜନା ଅଧୀନରେ ୨୦ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ଯୋଗାଇ ଦିଆଯିବ। ଆୟୁଷ୍ମାନ ଭାରତ ଯୋଜନା ଅଧୀନରେ ୫ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ସୁବିଧା ମହିଳାମାନଙ୍କୁ ମିଳିବ ବୋଲି ସେ କହିଥିଲେ।
ଏହା ସହିତ, ପ୍ରଧାନମନ୍ତ୍ରୀ ଘୋଷଣା କରିଥିଲେ ଯେ ପିଏମ ଆବାସ ଯୋଜନା ଅଧୀନରେ ଗରିବ ପରିବାରମାନଙ୍କୁ ଘର ଯୋଗାଇ ଦିଆଯିବ ଏବଂ ସେହି ଘର ପରିବାରର ମୁଖ୍ୟ ମହିଳାଙ୍କ ନାମରେ ପଞ୍ଜିକୃତ ହେବ, ଯାହା ମହିଳାଙ୍କ ସମ୍ମାନ ଓ ଅଧିକାରକୁ ଆହୁରି ମଜବୁତ କରିବ।
ସୂଚନାଯୋଗ୍ୟ, ପ୍ରଥମ ପର୍ଯ୍ୟାୟ ଭୋଟଗ୍ରହଣ ପୂର୍ବରୁ ନରେନ୍ଦ୍ର ମୋଦୀ ରାଜ୍ୟବାସୀଙ୍କୁ ୬ଟି ଗ୍ୟାରେଣ୍ଟି ଦେଇଥିଲେ। ଏବେ ମହିଳାଙ୍କୁ କେନ୍ଦ୍ର କରି ୧୦ଟି ନୂତନ ଗ୍ୟାରେଣ୍ଟି ଘୋଷଣା ସହ ବଙ୍ଗ ନିର୍ବାଚନରେ ରାଜନୈତିକ ପରିସ୍ଥିତି ଆହୁରି ରୋମାଞ୍ଚକର ହୋଇପଡ଼ିଛି। ଏହି ଘୋଷଣାଗୁଡ଼ିକ ଭୋଟରମାନଙ୍କ ଉପରେ କେତେ ପ୍ରଭାବ ପକାଇବ, ସେଥିପାଇଁ ଏବେ ସମସ୍ତଙ୍କ ନଜର ରହିଛି।
