ଚେନ୍ନାଇ : ତାମିଲନାଡୁରେ ନୂତନ ମୁଖ୍ୟମନ୍ତ୍ରୀ ଥାଲାପତି ବିଜୟ ଶପଥ ନେବା ପରେ ଆକ୍ସନ ମୋଡରେ ନଜର ଆସିଛନ୍ତି। ଶପଥ ନେବା ପରେ ସେ ରାଜ୍ୟର ୭୧୭ଟି ମଦ ଦୋକାନ ବନ୍ଦ କରିବାକୁ କଡ଼ା ନିର୍ଦ୍ଦେଶ ଜାରି କରିଛନ୍ତି।
ସରକାରୀ ନିର୍ଦ୍ଦେଶ ଅନୁଯାୟୀ, ଧାର୍ମିକ ସ୍ଥଳ, ଶିକ୍ଷାନୁଷ୍ଠାନ ଓ ବସ୍ ଷ୍ଟାଣ୍ଡ ନିକଟରୁ ମଦ ଦୋକାନ ହଟାଇବାକୁ କୁହାଯାଇଛି। ମନ୍ଦିର, ମସଜିଦ, ଚର୍ଚ୍ଚ, ସ୍କୁଲ, କଲେଜ ଏବଂ ବସ୍ ଷ୍ଟାଣ୍ଡର ୫୦୦ ମିଟର ଅଞ୍ଚଳ ମଧ୍ୟରେ ଥିବା ସମସ୍ତ ଦୋକାନ ବନ୍ଦ କରାଯିବ। ଏହି ପ୍ରକ୍ରିୟାକୁ ଆଗାମୀ ଦୁଇ ସପ୍ତାହ ମଧ୍ୟରେ ସମ୍ପୂର୍ଣ୍ଣ କରିବାକୁ ତାମିଲନାଡୁ ରାଜ୍ୟ ମାର୍କେଟିଂ କର୍ପୋରେସନ (ତାସମାକ)କୁ ନିର୍ଦ୍ଦେଶ ଦିଆଯାଇଛି।
ରାଜ୍ୟ ସରକାରଙ୍କ ତଥ୍ୟ ଅନୁସାରେ, ବର୍ତ୍ତମାନ ତାମିଲନାଡୁରେ ମୋଟ ୪,୭୬୫ଟି ମଦ ଦୋକାନ ଚାଲୁ ଅଛି। ନୂତନ ନୀତିରେ ଚିହ୍ନଟ ହୋଇଥିବା ୭୧୭ଟି ଦୋକାନ ମଧ୍ୟରେ ଧାର୍ମିକ ସ୍ଥଳ ନିକଟରେ ୨୭୬ଟି, ଶିକ୍ଷାନୁଷ୍ଠାନ ନିକଟରେ ୧୮୬ଟି ଏବଂ ବସ୍ ଷ୍ଟାଣ୍ଡ ନିକଟରେ ୨୫୫ଟି ଦୋକାନ ଅନ୍ତର୍ଭୁକ୍ତ ଅଛି।
ସରକାର ଏହି ପଦକ୍ଷେପକୁ ସାମାଜିକ ସଂସ୍କାର ଦିଗରେ ବଡ ଆରମ୍ଭ ଭାବେ ଦେଖାଉଛି। ନିଶାଦ୍ରବ୍ୟ ନିୟନ୍ତ୍ରଣ, ମହିଳା ସୁରକ୍ଷା ଓ ସାର୍ବଜନୀନ ସ୍ଥାନରେ ଶାନ୍ତି-ଶୃଙ୍ଖଳା ବଢ଼ାଇବାକୁ ମଧ୍ୟ ଅନ୍ୟାନ୍ୟ ନିଷ୍ପତ୍ତି ନିଆଯାଇଛି। ଏହା ସହ ଘରୋଇ ଗ୍ରାହକଙ୍କୁ ୨୦୦ ୟୁନିଟ୍ ପର୍ଯ୍ୟନ୍ତ ମାଗଣା ବିଦ୍ୟୁତ୍ ଯୋଗାଇବା ଘୋଷଣା ମଧ୍ୟ କରାଯାଇଛି।
