ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ଅକ୍ଟୋବର ୧୦ରେ ପ୍ରସ୍ତାବିତ କକ୍ରୋଚ୍ ଜନତା ପାର୍ଟି (ସିଜେପି)ର ବିକ୍ଷୋଭକୁ ଦୃଷ୍ଟିରେ ରଖି ରେଳବାଇ ପକ୍ଷରୁ ଏକାଧିକ ଟ୍ରେନ୍ ବାତିଲ୍ ଓ କିଛି ଟ୍ରେନ୍ର ସମୟ ପରିବର୍ତ୍ତନ କରାଯାଇଛି। ନୂଆଦିଲ୍ଲୀ ଓ ହଜରତ ନିଜାମୁଦ୍ଦିନ ରେଳ ଷ୍ଟେସନ୍ ନିକଟରେ ଯାତାୟାତ ଭିଡ଼ ବଢ଼ିବା ଆଶଙ୍କାରେ ରେଳବାଇ ଏହି ପଦକ୍ଷେପ ନେଇଛି।
ରେଳ ମନ୍ତ୍ରଣାଳୟ ଅନୁଯାୟୀ, ଅକ୍ଟୋବର ୯ ତାରିଖ ଅପରାହ୍ଣ ୨ଟା ପରେ ମୂଳ ଷ୍ଟେସନ୍ରୁ ଛାଡ଼ି ଅକ୍ଟୋବର ୧୦ ତାରିଖ ସକାଳ ୪ଟାରୁ ଅପରାହ୍ଣ ୨ଟା ମଧ୍ୟରେ ନୂଆଦିଲ୍ଲୀ କିମ୍ବା ହଜରତ ନିଜାମୁଦ୍ଦିନରେ ପହଞ୍ଚିବାକୁ ଥିବା ମେଲ୍ ଓ ଏକ୍ସପ୍ରେସ୍ ଟ୍ରେନ୍ଗୁଡ଼ିକୁ ଆରମ୍ଭ ଷ୍ଟେସନ୍ରୁ ବାତିଲ୍ କରାଯାଇଛି। ଯାତ୍ରୀଙ୍କ ଅସୁବିଧା କମାଇବା ଉଦ୍ଦେଶ୍ୟରେ ଏହି ନିଷ୍ପତ୍ତି ହୋଇଛି।
ବାତିଲ୍ ହୋଇଥିବା ଟ୍ରେନ୍ ମଧ୍ୟରେ ଡା. ଆମ୍ବେଦକର ନଗର–ନୂଆଦିଲ୍ଲୀ (୨୦୧୫୫), ଇନ୍ଦୋର–ହଜରତ ନିଜାମୁଦ୍ଦିନ (୦୯୩୦୯), ଇନ୍ଦୋର–ନୂଆଦିଲ୍ଲୀ (୧୨୪୧୫), ବାନ୍ଦ୍ରା ଟର୍ମିନସ୍–ହଜରତ ନିଜାମୁଦ୍ଦିନ (୧୨୨୪୭) ଓ ସାବରମତୀ–ନୂଆଦିଲ୍ଲୀ (୧୨୯୫୭) ରହିଛି। ଏଥିସହ ହାୱଡ଼ା–ନୂଆଦିଲ୍ଲୀ ରାଜଧାନୀ ଏକ୍ସପ୍ରେସ୍ (୧୨୩୦୧) ଓ ଶିଆଲଦା–ନୂଆଦିଲ୍ଲୀ ରାଜଧାନୀ ଏକ୍ସପ୍ରେସ୍ (୧୨୩୧୩)କୁ ମଧ୍ୟ ବାତିଲ୍ କରାଯାଇଛି।
ଅନ୍ୟପକ୍ଷରେ, ମୁମ୍ବାଇ ସେଣ୍ଟ୍ରାଲ୍–ନୂଆଦିଲ୍ଲୀ ତେଜସ୍ ରାଜଧାନୀ ଏକ୍ସପ୍ରେସ୍ (୧୨୯୫୧) ଓ ମୁମ୍ବାଇ ସେଣ୍ଟ୍ରାଲ୍–ହଜରତ ନିଜାମୁଦ୍ଦିନ ଟ୍ରେନ୍ (୧୨୯୫୩)ର ଯାତ୍ରା ସମୟ ୫ ଘଣ୍ଟା ଘୁଞ୍ଚାଯାଇଛି।
ଏପଟେ, ପ୍ରସ୍ତାବିତ ବିକ୍ଷୋଭ ପୂର୍ବରୁ ଦିଲ୍ଲୀ ପୁଲିସ ନୂଆଦିଲ୍ଲୀ ଅଞ୍ଚଳରେ ଭାରତୀୟ ନାଗରିକ ସୁରକ୍ଷା ସଂହିତାର ଧାରା ୧୬୩ ଲାଗୁ ଥିବା ଜଣାଇଛି। ବିନା ଅନୁମତିରେ ଜନସମାବେଶ କଲେ ଆଇନଗତ କାର୍ଯ୍ୟାନୁଷ୍ଠାନ ହେବ ବୋଲି ପୁଲିସ ଚେତାବନୀ ଦେଇଛି।
