ଆନ୍ଧ୍ରପ୍ରଦେଶରେ ପ୍ରଶାସନିକ କାର୍ଯ୍ୟକୁ ଦ୍ରୁତ ଓ ଗତିଶୀଳ କରିବାକୁ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ କଡ଼ା ପଦକ୍ଷେପ ନେଇଛନ୍ତି। ସରକାରୀ ଫାଇଲ୍ ନିଷ୍ପତ୍ତିରେ ଅନାବଶ୍ୟକ ବିଳମ୍ବ ରୋକିବା ପାଇଁ ସେ ‘ଫାଷ୍ଟ ଫାଇଲ୍ କ୍ଲିୟରାନ୍ସ’ ବ୍ୟବସ୍ଥାକୁ ଗୁରୁତ୍ୱ ଦେଇ ଗୁରୁତ୍ୱପୂର୍ଣ୍ଣ ଫାଇଲ୍ଗୁଡ଼ିକୁ ୨୪ ଘଣ୍ଟା ମଧ୍ୟରେ କ୍ଲିୟର କରିବାକୁ ଅଧିକାରୀ ଓ ମନ୍ତ୍ରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।
ଅମରାବତୀରେ ଆୟୋଜିତ ଜିଲ୍ଲାପାଳ ସମ୍ମିଳନୀରେ ନାଇଡୁ କହିଛନ୍ତି ଯେ, ସରକାରୀ ଯୋଜନାର ସଫଳ କାର୍ଯ୍ୟାନ୍ବୟନ ପାଇଁ ଫାଇଲ୍ ଅଟକି ରହିବା ଅନୁଚିତ। ଏହାକୁ ନଜରରେ ରଖି ଫାଇଲ୍ କ୍ଲିୟରାନ୍ସ ଆଧାରରେ ମନ୍ତ୍ରୀ ଓ ଅଧିକାରୀଙ୍କ ପାଇଁ ଏକ ର୍ୟାଙ୍କିଙ୍ଗ୍ ବ୍ୟବସ୍ଥା ମଧ୍ୟ ଆରମ୍ଭ କରାଯାଇଛି।
ଏହି ର୍ୟାଙ୍କିଙ୍ଗରେ କୃଷି ମନ୍ତ୍ରୀ ଅଚେନ୍ନାୟୁଡୁ ପ୍ରଥମ ସ୍ଥାନରେ ଥିବାବେଳେ ପି. ନାରାୟଣା ଦ୍ୱିତୀୟ ଓ ଟିଜି ଭରତ ତୃତୀୟ ସ୍ଥାନରେ ଅଛନ୍ତି। ମୁଖ୍ୟ ଶାସନ ସଚିବ ସାଇ ପ୍ରସାଦଙ୍କ କାର୍ଯ୍ୟଦକ୍ଷତାକୁ ମଧ୍ୟ ମୁଖ୍ୟମନ୍ତ୍ରୀ ପ୍ରଶଂସା କରିଛନ୍ତି। ଅତ୍ୟଧିକ କାର୍ଯ୍ୟଚାପ ସତ୍ତ୍ୱେ ସେ ହାରାହାରି ୧୦ ଘଣ୍ଟା ମଧ୍ୟରେ ଫାଇଲ୍ କ୍ଲିୟର କରୁଥିବା କୁହାଯାଇଛି।
ତେବେ କିଛି ମନ୍ତ୍ରୀଙ୍କ କାର୍ଯ୍ୟଶୈଳୀ ଉପରେ ଅସନ୍ତୋଷ ମଧ୍ୟ ପ୍ରକାଶ ପାଇଛି। ମନ୍ତ୍ରୀ ଏସ. ସବିତା ଗୋଟିଏ ଫାଇଲ୍ କ୍ଲିୟର କରିବାକୁ ହାରାହାରି ୧୩ ଦିନ ସମୟ ନେଉଥିବାବେଳେ ପୟ୍ୟାଭୁଲା କେଶବ ପ୍ରାୟ ୯ ଦିନ ୧୪ ଘଣ୍ଟା ସମୟ ନେଉଛନ୍ତି। ଏହି ର୍ୟାଙ୍କିଙ୍ଗ୍କୁ ନେଇ ବିରୋଧୀଙ୍କ ସମାଲୋଚନା ପରେ ସରକାର ଏହାକୁ ସାର୍ବଜନୀନ ନକରି ଆଭ୍ୟନ୍ତରୀଣ ସମୀକ୍ଷାରେ ସୀମିତ ରଖିବାକୁ ନିଷ୍ପତ୍ତି ନେଇଛି।
ଚନ୍ଦ୍ରବାବୁ ନାଇଡୁଙ୍କ ଏହି କଡ଼ା ଆଭିମୁଖ୍ୟ ଏବେ ଆନ୍ଧ୍ରପ୍ରଦେଶ ପ୍ରଶାସନିକ ମହଳରେ ଚର୍ଚ୍ଚାର ବିଷୟ ପାଲଟିଛି। ଏହାଦ୍ୱାରା ସରକାରୀ କାମରେ ଗତି ଆସିବା ସହ ସାଧାରଣ ଲୋକଙ୍କୁ ଶୀଘ୍ର ସେବା ମିଳିବ ବୋଲି ଆଶା କରାଯାଉଛି।
