ଆଇଆଇଏମସିଏଏ ଓଡିଶା ଚାପ୍ଟର ମିଟ୍: ପୂର୍ବତନ ଛାତ୍ରଛାତ୍ରୀଙ୍କ ସମ୍ପର୍କ ଉତ୍ସବ, ସମାଜସେବା ପାଇଁ ଅଙ୍କିତା ସମ୍ମାନିତ
ଭୁବନେଶ୍ୱର: ଆଇଆଇଏମସିଏଏ ଓଡିଶା ଚାପ୍ଟର ପକ୍ଷରୁ ଆୟୋଜିତ ପୂର୍ବତନ ଛାତ୍ରଛାତ୍ରୀ ମିଟ୍ରେ ଓଡିଶାରେ ଥିବା ଆଇଆଇଏମସି ପରିବାରର ସଦସ୍ୟମାନେ ଏକତ୍ରିତ ହୋଇ ସମ୍ପର୍କ, ପେଶାଗତ ସହଯୋଗ ଓ ସମାଜ ପ୍ରତି ଦାୟିତ୍ୱକୁ ଉତ୍ସବ ଭାବେ ପାଳନ କରିଥିଲେ।
ଏହି ଅବସରରେ ସମାଜସେବା ପାଇଁ “ଆଇଆଇଏମସିଏଏ ପୁରସ୍କାର” ଅଙ୍କିତା ସାହୁଙ୍କୁ ପ୍ରଦାନ କରାଯାଇଥିଲା। “ଓଡିଶାର ପ୍ୟାଡ୍ ମହିଳା” ଭାବେ ପରିଚିତ ଅଙ୍କିତା ପ୍ରାୟ ୧୩ ବର୍ଷ ଧରି ମହିଳାଙ୍କ ମାସିକ ସ୍ୱଚ୍ଛତା ଓ ସଚେତନତା କ୍ଷେତ୍ରରେ କାମ କରୁଛନ୍ତି।
୨୦୧୨–୧୩ ଓଡିଆ ପତ୍ରକାରିତା ବ୍ୟାଚର ପୂର୍ବତନ ଛାତ୍ରୀ ଅଙ୍କିତା ସମାଜରେ ମାସିକ ନେଇ ଥିବା ଅନ୍ଧବିଶ୍ୱାସ ଭାଙ୍ଗିବା ସହିତ ସହଜ ଓ ସୁଲଭ ସ୍ୱଚ୍ଛତା ପ୍ରଚଳନ କରୁଛନ୍ତି। ପୁରସ୍କାର ଗ୍ରହଣ ସମୟରେ ସେ କହିଥିଲେ ଯେ, ମାସିକ ସ୍ୱଚ୍ଛତା ନେଇ ସଚେତନତାରେ ପୁରୁଷମାନଙ୍କ ଭୂମିକା ମଧ୍ୟ ସମାନ ଗୁରୁତ୍ୱପୂର୍ଣ୍ଣ।
ଏହି ଅବସରରେ ରଜତ ଜୟନ୍ତୀ ପାଳନ କରୁଥିବା ମାନସ୍ୱିନୀ ମିଶ୍ର ଓ ବିଶ୍ୱଜିତ ସାହୁଙ୍କୁ ମଧ୍ୟ ସମ୍ମାନିତ କରାଯାଇଥିଲା।
ସଭାରେ ଆଇଆଇଏମସି ଢେଙ୍କାନାଳର କ୍ଷେତ୍ରୀୟ ନିର୍ଦ୍ଦେଶକ ଆନନ୍ଦ ପ୍ରଧାନ କହିଥିଲେ, “ସଂସ୍ଥାର ଶକ୍ତି ତାହାର ଲୋକମାନେ। ପୂର୍ବତନ ଛାତ୍ରଛାତ୍ରୀ ମିଟ୍ ଆମକୁ ଏକତ୍ର ରଖିଥାଏ।” ସେ ନୂତନ ଏମଏ କୋର୍ସ ଓ ଭବିଷ୍ୟତରେ ଇନ୍କ୍ୟୁବେସନ୍ କେନ୍ଦ୍ର ସ୍ଥାପନ ଯୋଜନା ବିଷୟରେ ମଧ୍ୟ କହିଥିଲେ।
ସଭାପତି ସନ୍ଦୀପ ସେଠୀ ଏହିପରି ମିଟ୍ର ଗୁରୁତ୍ୱ ବ୍ୟକ୍ତ କରି ସମ୍ପର୍କ ଓ ସହଯୋଗକୁ ଆରୋ ମଜବୁତ କରିବାକୁ ଆହ୍ୱାନ ଜଣାଇଥିଲେ।
ଏହି କାର୍ଯ୍ୟକ୍ରମରେ ପ୍ରସିଦ୍ଧ ସାମ୍ବାଦିକ କସ୍ତୁରୀ ରାୟ, ବିଭୁଦତ୍ତ ମହାପାତ୍ର, ବିରାଜ ସ୍ୱାଇଁ , ଶାରଦା ଲାହାଙ୍ଗୀର, ସଙ୍ଗୀତା ଅଗ୍ରୱାଲ, ବ୍ୟୋମକେଶ ବିଶ୍ୱାଳ ଆଦି ଉପସ୍ଥିତ ଥିଲେ।
