ବେଙ୍ଗାଲୁରୁ: କର୍ଣ୍ଣାଟକର ବରିଷ୍ଠ କଂଗ୍ରେସ ନେତା ଏବଂ ରାଜ୍ୟ ମନ୍ତ୍ରୀ ଡି. ସୁଧାକରଙ୍କ ଦେହାନ୍ତ ହୋଇଛି। ସେ ଦୀର୍ଘଦିନ ଧରି ଅସୁସ୍ଥ ଥିବା ସହ ଚିକିତ୍ସାଧୀନ ଥିଲେ। ତାଙ୍କ ଦେହାନ୍ତରେ କର୍ଣ୍ଣାଟକ ରାଜନୀତିରେ ଶୋକର ଛାୟା ଖେଳିଯାଇଛି।
ଉପମୁଖ୍ୟମନ୍ତ୍ରୀ ଡି.କେ. ଶିବକୁମାର ସୋସିଆଲ ମିଡିଆରେ ଶୋକବାର୍ତ୍ତା ପ୍ରକାଶ କରି କହିଛନ୍ତି ଯେ, ଡି. ସୁଧାକର ଜଣେ ନିଷ୍ଠାବାନ ସହଯୋଗୀ ଓ ଜନମୁଖୀ ନେତା ଥିଲେ। ହିରିୟୁର ବିଧାୟକ ଏବଂ ଚିତ୍ରଦୁର୍ଗ ଜିଲ୍ଲାର ଦାୟିତ୍ୱରେ ଥିବା ମନ୍ତ୍ରୀ ଭାବେ ସେ ସାଧାରଣ ଲୋକଙ୍କ ସେବାରେ ନିଜକୁ ସମର୍ପିତ କରିଥିଲେ। ଯୋଜନା ଓ ପରିସଂଖ୍ୟାନ ବିଭାଗରେ ମଧ୍ୟ ତାଙ୍କ ଅବଦାନ ଉଲ୍ଲେଖନୀୟ ଥିଲା।
୨୦୦୪ ମସିହାରେ କଂଗ୍ରେସ ଟିକେଟରେ ପ୍ରଥମେ ବିଧାୟକ ଭାବେ ବିଜୟୀ ହୋଇଥିବା ଡି. ସୁଧାକର ପରେ ସ୍ୱାଧୀନ ପ୍ରାର୍ଥୀ ଭାବେ ମଧ୍ୟ ନିର୍ବାଚନ ଜିତିଥିଲେ। ସରଳ ବ୍ୟକ୍ତିତ୍ୱ, ଦୃଢ଼ କାର୍ଯ୍ୟନୀତି ଓ ଜନସମ୍ପର୍କ ପାଇଁ ସେ ଲୋକମାନଙ୍କ ମଧ୍ୟରେ ବେଶ୍ ଲୋକପ୍ରିୟ ଥିଲେ। ତାଙ୍କ ଦେହାନ୍ତକୁ କଂଗ୍ରେସ ଦଳ ଓ ରାଜ୍ୟ ପାଇଁ ଅପୂରଣୀୟ କ୍ଷତି ବୋଲି ମତ ପ୍ରକାଶ ପାଇଛି।
