ଟିଭିକେ ମୁଖ୍ୟ ତଥା ତାମିଲନାଡୁ ମୁଖ୍ୟମନ୍ତ୍ରୀ ଚନ୍ଦ୍ରଶେଖରନ ଯୋଶେଫ ବିଜୟଙ୍କ ନେତୃତ୍ୱାଧୀନ ସରକାର ବୁଧବାର ଆସ୍ଥା ଭୋଟ୍ରେ ବିଜୟୀ ହୋଇଛି। ସଂଖ୍ୟାଗରିଷ୍ଠତା ପାଇଁ ୧୧୮ ଜଣ ବିଧାୟକଙ୍କ ସମର୍ଥନ ଆବଶ୍ୟକ ଥିବାବେଳେ ସରକାରଙ୍କ ପକ୍ଷରେ ୧୪୪ଟି ଭୋଟ୍ ପଡ଼ିଛି।
ଟିଭିକେର ୧୦୭ ଜଣ ନବନିର୍ବାଚିତ ବିଧାୟକଙ୍କ ମଧ୍ୟରୁ ଜଣେ ବିଧାୟକ ଭୋଟ୍ଦାନ କରିପାରିନଥିଲେ। ତାଙ୍କ ବିଜୟକୁ ନେଇ ମାମଲା ହାଇକୋର୍ଟରେ ବିଚାରାଧୀନ ଥିବାରୁ ସେ ଏପର୍ଯ୍ୟନ୍ତ ଶପଥ ଗ୍ରହଣ କରିନାହାନ୍ତି। ଫଳରେ ଟିଭିକେ ପକ୍ଷରୁ ୧୦୬ଟି ଭୋଟ୍ ସରକାରଙ୍କ ସମର୍ଥନରେ ପଡ଼ିଥିଲା। ସେଥିପାଇଁ କଂଗ୍ରେସର ୫, ସିପିଆଇ(ଏମ୍)ର ୨, ସିପିଆଇର ୨, ଭିସିକେର ୨ ଏବଂ ଆଇୟୁଏମ୍ଏଲ୍ର ୨ ଜଣ ବିଧାୟକ ମଧ୍ୟ ସମର୍ଥନ ଜଣାଇଥିଲେ।
ଅନ୍ୟପକ୍ଷରେ ଡିଏମ୍କେ ୫୯ଟି ଆସନରେ ବିଜୟୀ ହୋଇଥିବାବେଳେ ଡିଏମ୍ଡିକେ ଗୋଟିଏ, ପିଏମ୍କେ ୪ଟି ଏବଂ ବିଜେପି ଗୋଟିଏ ଆସନ ଜିତିଛି। ଜଣେ ସ୍ୱାଧୀନ ପ୍ରାର୍ଥୀ ମଧ୍ୟ ବିଜୟୀ ହୋଇଛନ୍ତି।
ଆସ୍ଥା ଭୋଟ୍ ପୂର୍ବରୁ ଏଆଇଏଡିଏମ୍କେ ନେତା ଏଡପ୍ପାଡି କେ ପଲାନିସ୍ୱାମୀଙ୍କ ଶିବିର ଟିଭିକେ ଉପରେ ଘୋଡ଼ା ବେପାର ଅଭିଯୋଗ ଆଣିଥିଲା। ତେବେ ମୁଖ୍ୟମନ୍ତ୍ରୀ ବିଜୟ ସେହି ଅଭିଯୋଗକୁ ଖଣ୍ଡନ କରି କହିଛନ୍ତି ଯେ, ତାଙ୍କ ସରକାର “ଘୋଡ଼ା ବେଗରେ” କାମ କରୁଛି, କିନ୍ତୁ କୌଣସି ଘୋଡ଼ା ବେପାରରେ ଲିପ୍ତ ନୁହେଁ। ସେ କହିଛନ୍ତି, ତାଙ୍କ ସରକାର ସର୍ବଦା ଧର୍ମନିରପେକ୍ଷ ରହିବ ଏବଂ ପୂର୍ବ ସରକାରଙ୍କ ଜନକଲ୍ୟାଣମୂଳକ ଯୋଜନାଗୁଡ଼ିକୁ ଜାରି ରଖିବ।
