ନୋଏଡା: ଉତ୍ତରପ୍ରଦେଶର ନୋଏଡାସ୍ଥିତ ସୁପରନୋଭା ବିଲ୍ଡିଂର ୪୩ତମ ମହଲାରୁ ଡେଇଁ ଜଣେ ଯୁବକଙ୍କ ମୃତ୍ୟୁ ଘଟିଛି। ପୁଲିସ ମୃତକଙ୍କୁ ୨୯ ବର୍ଷୀୟ ସମ୍ଭବ ଜୈନ ବୋଲି ଚିହ୍ନଟ କରିଛି। ସେ ହରିୟାଣାର ଗୁରୁଗ୍ରାମର ମାନେସର ଅଞ୍ଚଳର ବାସିନ୍ଦା ବୋଲି ଜଣାପଡ଼ିଛି।
ପୁଲିସ ଅନୁସାରେ, ସେକ୍ଟର-୯୪ସ୍ଥିତ ସୁପରନୋଭା ସ୍ପାଇରା ଟାୱାରରୁ ଜଣେ ବ୍ୟକ୍ତି ଡେଇଁଥିବା ନେଇ ପୂର୍ବାହ୍ନ ପ୍ରାୟ ୧୧ଟା ୩୦ରେ ସୂଚନା ମିଳିଥିଲା। ଖବର ପାଇ ସେକ୍ଟର-୧୨୬ ଥାନା ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ମୃତକଙ୍କ ପରିବାରକୁ ଖବର ଦିଆଯାଇଛି ଏବଂ ମୃତଦେହକୁ ବ୍ୟବଚ୍ଛେଦ ପାଇଁ ପଠାଯାଇଛି।
ପ୍ରାଥମିକ ତଦନ୍ତରେ ଉଚ୍ଚତାରୁ ପଡ଼ିବା ଯୋଗୁ ଯୁବକଙ୍କ ଶରୀରରେ ଗୁରୁତର ଆଘାତ ଲାଗିଥିବା ଜଣାପଡ଼ିଛି। ଘଟଣା ସମୟରେ ପ୍ରଚଣ୍ଡ ଶବ୍ଦ ହୋଇଥିବା ମଧ୍ୟ କୁହାଯାଉଛି। ଯୁବକ ଜଣକ ସୁପରନୋଭାରେ ଏୟାରବିଏନ୍ବି ମାଧ୍ୟମରେ ରହୁଥିବା ସୂଚନା ମିଳିଛି।
ଘଟଣାର କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଜଣେ ଏସି ମେକାନିକ୍ ତାଙ୍କୁ ରୋକିବାକୁ ଚେଷ୍ଟା କରିଥିବା ଏବଂ ସେ ଅବସାଦରେ ଥିବା କହିଥିବା ନେଇ ଗଣମାଧ୍ୟମରେ ଦାବି ହୋଇଛି। ତେବେ ଏହା ସ୍ୱାଧୀନ ଭାବେ ନିଶ୍ଚିତ ହୋଇନାହିଁ। ସୋସିଆଲ ମିଡିଆରେ ଘଟଣାର ଭିଡିଓ ଭାଇରାଲ ହୋଇଥିବାବେଳେ ପୁଲିସ ସମ୍ପୂର୍ଣ୍ଣ ଘଟଣାର ତଦନ୍ତ କରୁଛି।
