Breaking PLUSଦେଶମୁଖ୍ୟ ଖବର

ନଭେମ୍ବର ୧୯ରେ ଶିଳ୍ପ ଓ ବାଣିଜ୍ୟ ମହାସମ୍ମିଳନୀ ଉଦ୍‌ଘାଟନ କରିବେ ମୋଦୀ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନଭେମ୍ବର ୧୯ ତାରିଖରେ ନୂଆଦିଲ୍ଲୀର ଭାରତ ମଣ୍ଡପମ୍‌ଠାରେ ଫେଡେରେସନ୍‌ ଅଫ୍‌ ଇଣ୍ଡିଆନ୍‌ ଚେମ୍ବର୍ସ ଅଫ୍‌ କମର୍ସ ଆଣ୍ଡ ଇଣ୍ଡଷ୍ଟ୍ରି ର ବାର୍ଷିକ ସାଧାରଣ ସଭା ଓ ବାର୍ଷିକ ସମ୍ମିଳନୀ ଉଦ୍‌ଘାଟନ କରିବେ। ବୁଧବାର ଏନେଇ ଏକ ସରକାରୀ ବିବୃତିରେ ସୂଚନା ଦିଆଯାଇଛି।
‘ଭାରତ ୨୦୪୭’ ବିଷୟବସ୍ତୁକୁ ନେଇ ଆୟୋଜିତ ଏହି ସମ୍ମିଳନୀରେ ୨,୫୦୦ରୁ ଅଧିକ ପ୍ରତିନିଧି ଯୋଗଦେବେ। ଏଥିରେ ଶିଳ୍ପପତି, ବିଭିନ୍ନ କମ୍ପାନିର ମୁଖ୍ୟ, ରାଷ୍ଟ୍ରଦୂତ, କୂଟନୀତିଜ୍ଞ ଓ ନୀତି ନିର୍ଦ୍ଧାରକମାନେ ସାମିଲ ହେବେ। ୨୦୨୬-୨୭ ବର୍ଷ ଫିକିର ଶତବାର୍ଷିକୀ ବର୍ଷ। ୧୯୨୭ ଏପ୍ରିଲ ୭ରେ ପ୍ରତିଷ୍ଠିତ ଏହି ସଂଗଠନ ୨୦୨୭ରେ ୧୦୦ ବର୍ଷ ପୂରଣ କରିବ।
ବିଶ୍ୱର ଅନ୍ୟ ପ୍ରମୁଖ ଅର୍ଥନୀତି ତୁଳନାରେ ଭାରତର ଅର୍ଥନୀତି ଅଧିକ ସ୍ଥିରତା ପ୍ରଦର୍ଶନ କରୁଥିବା ସମୟରେ ଏହି ସମ୍ମିଳନୀ ଆୟୋଜିତ ହେଉଛି। ଆର୍‌ବିଆଇ ଅନୁସାରେ, ଦୃଢ଼ ଆର୍ଥିକ ଭିତ୍ତିଭୂମି, ଘରୋଇ ଚାହିଦା ଓ ସେବା କ୍ଷେତ୍ରର ଅଭିବୃଦ୍ଧି ଦେଶର ଅର୍ଥନୀତିକୁ ସମର୍ଥନ ଦେଉଛି। ୨୦୨୬-୨୭ର ପ୍ରଥମାର୍ଦ୍ଧରେ ସାମଗ୍ରୀ ରପ୍ତାନିରେ ଦୁଇ ଅଙ୍କ ବିଶିଷ୍ଟ ବୃଦ୍ଧି ଯୋଗୁଁ ବାଣିଜ୍ୟ ନିଅଣ୍ଟ ହ୍ରାସ ପାଇଛି। ଅନ୍ୟପଟେ ଆଇଏମ୍‌ଏଫ୍‌ ଭାରତର ୨୦୨୬-୨୭ ଆର୍ଥିକ ଅଭିବୃଦ୍ଧି ଆକଳନକୁ ୭ ପ୍ରତିଶତକୁ ବଢ଼ାଇଛି।
ବର୍ତ୍ତମାନ ଫିକି ସରକାରୀ, ଘରୋଇ ଓ ବହୁରାଷ୍ଟ୍ରୀୟ କ୍ଷେତ୍ରର ୨.୫ ଲକ୍ଷରୁ ଅଧିକ କମ୍ପାନିର ପ୍ରତିନିଧିତ୍ୱ କରୁଛି।

Show More

Related Articles

Back to top button