ଉତ୍ତର ପ୍ରଦେଶରେ ଆଜି ଯୋଗୀ ମନ୍ତ୍ରିମଣ୍ଡଳ ସମ୍ପ୍ରସାରଣ ସମ୍ଭାବନା

ଲକ୍ଷ୍ନୌ: ଉତ୍ତର ପ୍ରଦେଶରେ ଆଜି ଯୋଗୀ ଆଦିତ୍ୟନାଥ ସରକାରଙ୍କ ଦ୍ୱିତୀୟ ମନ୍ତ୍ରିମଣ୍ଡଳ ସମ୍ପ୍ରସାରଣ ହେବାର ସମ୍ଭାବନା ରହିଛି। ଆସନ୍ତା ବର୍ଷ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ବିଜେପି ଜାତିୟ ଓ ଆଞ୍ଚଳିକ ସନ୍ତୁଳନକୁ ଗୁରୁତ୍ୱ ଦେଇ ଏହି ବିସ୍ତାର କରିବାକୁ ଯାଉଛି। ସୂତ୍ର ଅନୁଯାୟୀ, ଛଅଜଣ ନୂତନ ମନ୍ତ୍ରୀଙ୍କୁ ଶପଥ ଦିଆଯାଇପାରେ ଏବଂ କିଛି ବର୍ତ୍ତମାନର ମନ୍ତ୍ରୀଙ୍କୁ କ୍ୟାବିନେଟ୍ ପଦବୀକୁ ପଦୋନ୍ନତି ମିଳିପାରେ।
ରାଜ୍ୟସଭା ନିର୍ବାଚନ ସମୟରେ ସମାଜବାଦୀ ପାର୍ଟି ବିରୋଧରେ ଭୋଟ୍ ଦେଇଥିବା ମନୋଜ ପାଣ୍ଡେ ଓ ପୂଜା ପାଲଙ୍କୁ ମଧ୍ୟ ମନ୍ତ୍ରିମଣ୍ଡଳରେ ସ୍ଥାନ ମିଳିବା ନେଇ ଚର୍ଚ୍ଚା ଜୋର ଧରିଛି।
ଶନିବାର ପଶ୍ଚିମବଙ୍ଗର ଶପଥ ଗ୍ରହଣ ଉତ୍ସବରୁ ଫେରିବା ପରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ରାଜ୍ୟପାଳ ଆନନ୍ଦୀବେନ ପଟେଲଙ୍କ ସହ ଭେଟିଥିଲେ। ଏହାପରେ ରବିବାର ଅପରାହ୍ନରେ ମନ୍ତ୍ରିମଣ୍ଡଳ ବିସ୍ତାର ନେଇ ଅଟକଳ ଆହୁରି ବଢ଼ିଛି।
ବର୍ତ୍ତମାନ ଯୋଗୀ ମନ୍ତ୍ରିମଣ୍ଡଳରେ ମୁଖ୍ୟମନ୍ତ୍ରୀ ଓ ଦୁଇ ଉପମୁଖ୍ୟମନ୍ତ୍ରୀଙ୍କ ସମେତ ୫୪ ଜଣ ମନ୍ତ୍ରୀ ଅଛନ୍ତି। ରାଜ୍ୟରେ ସର୍ବାଧିକ ୬୦ ଜଣ ମନ୍ତ୍ରୀ ରହିପାରିବେ।