ମଣିପୁରରେ ରକ୍ତାକ୍ତ ହିଂସା: ଗୁଳିମାଡ଼ରେ ୨ ମହିଳା ମୃତ

ଇମ୍ଫାଲ: ମଣିପୁରରେ ଶାନ୍ତି ଫେରାଇ ଆଣିବା ପାଇଁ ପ୍ରଶାସନର ଉଦ୍ୟମ ମଧ୍ୟରେ ପୁଣିଥରେ ହିଂସା ଘଟିଛି। ଏକ ସମ୍ବେଦନଶୀଳ ଗାଁରେ ଅଜ୍ଞାତ ସଶସ୍ତ୍ର ଦୁର୍ବୃତ୍ତଙ୍କ ଗୁଳିମାଡ଼ରେ ଦୁଇ ଜଣ ମହିଳାଙ୍କ ମୃତ୍ୟୁ ଘଟିଛି। ଏହା ପରେ ଏକାଧିକ ଫାର୍ମହାଉସ୍‌ ଓ ବାସଗୃହରେ ନିଆଁ ଲଗାଇ ଦିଆଯାଇଥିବାରୁ ଅଞ୍ଚଳରେ ଉତ୍ତେଜନା ଦେଖାଦେଇଛି।

ସୂଚନା ଅନୁଯାୟୀ, ଅତ୍ୟାଧୁନିକ ଅସ୍ତ୍ରରେ ସଜ୍ଜିତ ଦୁର୍ବୃତ୍ତମାନେ ହଠାତ୍‌ ଗାଁରେ ପ୍ରବେଶ କରି ଅତର୍କିତ ଗୁଳିଚାଳନା କରିଥିଲେ। ଗୁଳି ଶବ୍ଦ ଶୁଣି ଲୋକେ ଭୟରେ ଦୌଡ଼ି ପଳାଇଥିଲେ। ଏହି ସମୟରେ ଦୁଇ ଜଣ ମହିଳା ଗୁଳିର ଶିକାର ହୋଇଥିଲେ। ଉଭୟଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିଲା।

ଗୁଳିକାଣ୍ଡ ପରେ ଆକ୍ରମଣକାରୀମାନେ ଅଞ୍ଚଳରେ ଥିବା ଏକାଧିକ ଫାର୍ମହାଉସ୍‌ ଓ ଘରେ ନିଆଁ ଲଗାଇ ଦେଇଥିଲେ। ନିଆଁରେ ବହୁ ସମ୍ପତ୍ତି ନଷ୍ଟ ହୋଇଥିବା ଜଣାପଡ଼ିଛି। ଅଗ୍ନିଶମ ବାହିନୀ ପହଞ୍ଚି ଦୀର୍ଘ ସମୟର ଉଦ୍ୟମ ପରେ ନିଆଁକୁ ନିୟନ୍ତ୍ରଣ କରିଥିଲା।

ଘଟଣା ପରେ ଆସାମ ରାଇଫଲ୍ସ ଓ ମଣିପୁର ପୋଲିସର ଅତିରିକ୍ତ ଯବାନଙ୍କୁ ଅଞ୍ଚଳରେ ମୁତୟନ କରାଯାଇଛି। ସୁରକ୍ଷା ବାହିନୀ ପକ୍ଷରୁ ଫ୍ଲାଗ୍‌ ମାର୍ଚ୍ଚ କରାଯିବା ସହ ଆକ୍ରମଣକାରୀଙ୍କ ସନ୍ଧାନରେ ଘେରାବନ୍ଦୀ କରି ତଲାସି ଅଭିଯାନ ଚାଲିଛି।

୨୦୨୩ ମେ’ ମାସରୁ ମୈତେଇ ଓ କୁକି ସମ୍ପ୍ରଦାୟ ମଧ୍ୟରେ ଜାତିଗତ ସଂଘର୍ଷ ପରେ ମଣିପୁରରେ ଅଶାନ୍ତି ଲାଗି ରହିଛି। ଶାନ୍ତି ପ୍ରତିଷ୍ଠା ପାଇଁ କେନ୍ଦ୍ର ଓ ରାଜ୍ୟ ସରକାରଙ୍କ ଉଦ୍ୟମ ସତ୍ତ୍ୱେ ଏଭଳି ହିଂସା ଘଟଣା ପୁଣିଥରେ ସୁରକ୍ଷା ବ୍ୟବସ୍ଥା ନେଇ ପ୍ରଶ୍ନ ଉଠାଇଛି।