ଏସୀୟ କ୍ରୀଡ଼ା ୨୦୨୬ରେ ଭାରତକୁ ମିଳିଛି ଆଉ ଏକ ସ୍ୱର୍ଣ୍ଣ ପଦକ। ମହିଳା କବାଡି ଫାଇନାଲରେ ଇରାନକୁ ୩୭-୩୪ ପଏଣ୍ଟରେ ପରାସ୍ତ କରି ଭାରତୀୟ ଦଳ ସ୍ୱର୍ଣ୍ଣ ପଦକ ହାତେଇଛି। ଏହା ଚଳିତ ଏସୀୟ କ୍ରୀଡ଼ାରେ ଭାରତର ତୃତୀୟ ସ୍ୱର୍ଣ୍ଣ ଏବଂ ମୋଟ ୨୭ତମ ପଦକ।
ମ୍ୟାଚ୍ର ଆରମ୍ଭରୁ ଭାରତୀୟ ଦଳ ଇରାନ ଉପରେ ଚାପ ସୃଷ୍ଟି କରିଥିଲା। ପ୍ରଥମାର୍ଦ୍ଧ ଶେଷରେ ଭାରତ ୨୨-୧୬ରେ ଆଗୁଆ ରହିଥିଲା। କିନ୍ତୁ ଦ୍ୱିତୀୟାର୍ଦ୍ଧରେ ଇରାନ ଜୋରଦାର ପ୍ରତ୍ୟାବର୍ତ୍ତନ କରିଥିଲା। ଭାରତୀୟ ଦଳ ଅଲଆଉଟ୍ ହେବା ପରେ ଏକ ସମୟରେ ସ୍କୋର ୨୭-୨୬କୁ ଖସିଆସିଥିଲା।
ମ୍ୟାଚ୍ର ଏହି ରୋମାଞ୍ଚକର ପର୍ଯ୍ୟାୟରେ ଭାରତ ନିଜ ରଣନୀତି ବଦଳାଇ ଖେଳକୁ ପୁଣି ନିୟନ୍ତ୍ରଣକୁ ନେଇଥିଲା। ବିଶେଷକରି ଶେଷ ପାଞ୍ଚ ମିନିଟ୍ରେ ଭାରତୀୟ ଖେଳାଳିମାନେ ଚାପ ମଧ୍ୟରେ ଦମଦାର ପ୍ରଦର୍ଶନ କରିଥିଲେ। ଲଗାତାର ପଏଣ୍ଟ ହାସଲ କରି ଭାରତ ଶେଷରେ ୩୭-୩୪ରେ ମ୍ୟାଚ୍ ଜିତି ସ୍ୱର୍ଣ୍ଣ ପଦକ ନିଶ୍ଚିତ କରିଥିଲା।
