ସହରର ଆନନ୍ତପୁର ବସ୍ତିରେ ଜନଗଣନା କାମ କରୁଥିବା କର୍ମଚାରୀଙ୍କୁ ଆକ୍ରମଣ ଘଟଣା ନେଇ ଚଞ୍ଚଳତା ସୃଷ୍ଟି ହୋଇଛି। ବୁଧବାର ଏନଏସି କାର୍ଯ୍ୟାଳୟର ରଘୁନାଥ ଦୀକ୍ଷିତଙ୍କ ନେତୃତ୍ୱରେ ଚାରିଜଣ କର୍ମଚାରୀ ବସ୍ତିରେ ଜନଗଣନା କରିବାକୁ ଯାଇଥିଲେ। ଏହି ସମୟରେ ସେମାନେ ନିକୁଞ୍ଜ ବିହାରୀ ଶତପଥୀଙ୍କ ଘରକୁ ପହଞ୍ଚିଥିବା ବେଳେ ବିବାଦ ସୃଷ୍ଟି ହୋଇଥିଲା।
ଅଭିଯୋଗ ଅନୁସାରେ, ନିକୁଞ୍ଜ ଶତପଥୀ ଓ ତାଙ୍କ ପୁଅ କର୍ମଚାରୀମାନଙ୍କୁ ଆକ୍ରମଣ କରି ମାଡ ମାରିଥିଲେ, ଯାହାରେ ଜଣେ ମହିଳା କର୍ମଚାରୀ ଗୁରୁତର ଆହତ ହୋଇଥିଲେ। ସେଥିପାଇଁ ତାଙ୍କ ସ୍କୁଟିକୁ ଭାଙ୍ଗି ଦିଆଯାଇଥିବା ସହ ଅଶ୍ଳୀଳ ଭାଷାରେ ଗାଳି ଗୁଲଜ କରାଯାଇଥିବା ମଧ୍ୟ ଅଭିଯୋଗ ହୋଇଛି।
ଘଟଣା ବିଷୟରେ ଖବର ପାଇ ଉପଜିଲାପାଳ ଦିନମଣି ନାୟକ, ତହସିଲଦାର ଶୁଭଙ୍କର ମହାନ୍ତି, ଉପଖଣ୍ଡ ଆରକ୍ଷୀ ଅଧିକାରୀ ରଜନୀକାନ୍ତ ସାମଲ ଓ ଥାନା ଅଧିକାରୀ ଜିତେନ୍ଦ୍ର ମଲ୍ଲିକ ଘଟଣାସ୍ଥଳରେ ପହଞ୍ଚି ସ୍ଥିତି ନିୟନ୍ତ୍ରଣ କରିଥିଲେ। ପରେ ପୁଲିସ କାର୍ଯ୍ୟବାହୀ କରି ଘଟଣାରେ ସମ୍ପୃକ୍ତ ବାପା-ପୁଅଙ୍କୁ ଗିରଫ କରିଛି।
ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଜାରି ରହିଥିବା ବେଳେ ପୁଲିସ ତଦନ୍ତ ଜାରି ରହିଛି।
