ଭୁବନେଶ୍ୱର: ଓଡ଼ିଶାରେ ଉଚ୍ଚଶିକ୍ଷା କ୍ଷେତ୍ରରେ ଏକ ଐତିହାସିକ ପଦକ୍ଷେପ ନିଆଯାଇଛି। ରାଜ୍ୟ କ୍ୟାବିନେଟ ମେଡିକାଲ ଓ ବୈଷୟିକ ଶିକ୍ଷାରେ ସାମାଜିକ ଓ ଶିକ୍ଷାଗତ ପଛୁଆବର୍ଗ (SEBC) ପାଇଁ ସଂରକ୍ଷଣକୁ ଅନୁମୋଦନ କରିଛି। ଏହା ସହିତ ଅନୁସୂଚିତ ଜାତି (SC) ଓ ଅନୁସୂଚିତ ଜନଜାତି (ST) ପାଇଁ ସଂରକ୍ଷଣ ସୀମାକୁ ମଧ୍ୟ ବୃଦ୍ଧି କରାଯାଇଛି।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ସୂଚନା ଅନୁଯାୟୀ, ପ୍ରଥମଥର ପାଇଁ SEBC ଛାତ୍ରଛାତ୍ରୀମାନେ ମେଡିକାଲ, ଇଞ୍ଜିନିୟରିଂ ଓ ଅନ୍ୟାନ୍ୟ ବୈଷୟିକ ପାଠ୍ୟକ୍ରମରେ ୧୧.୨୫ ପ୍ରତିଶତ ସଂରକ୍ଷଣ ପାଇବେ। ନୂତନ ବ୍ୟବସ୍ଥା ଅନୁଯାୟୀ, ST ପାଇଁ ସଂରକ୍ଷଣ ୨୨.୫୦ ପ୍ରତିଶତ ଓ SC ପାଇଁ ୧୬.୨୫ ପ୍ରତିଶତ ନିର୍ଦ୍ଧାରିତ ହୋଇଛି।
ଏହି ନୀତି ରାଜ୍ୟର ସମସ୍ତ ବିଶ୍ୱବିଦ୍ୟାଳୟ, ଅନୁବନ୍ଧିତ କଲେଜ, ITI ଓ ପଲିଟେକ୍ନିକ ସହିତ ମେଡିକାଲ, ଇଞ୍ଜିନିୟରିଂ, ମ୍ୟାନେଜମେଣ୍ଟ, ଫାର୍ମାସି, ନର୍ସିଂ, କୃଷି ଓ ଅନ୍ୟାନ୍ୟ ପ୍ରଯୁକ୍ତିମୂଳକ କୋର୍ସରେ ଲାଗୁ ହେବ। UG ଓ PG ସ୍ତରରେ ଡିଗ୍ରୀ, ଡିପ୍ଲୋମା ଓ ସର୍ଟିଫିକେଟ କୋର୍ସମାନେ ଏହାର ଅଧୀନରେ ଆସିବେ।
ନୂତନ ନୀତି ଲାଗୁ ହେଲେ ମେଡିକାଲ ଓ ଇଞ୍ଜିନିୟରିଂ କୋର୍ସରେ SC ଓ ST ଛାତ୍ରଛାତ୍ରୀଙ୍କ ସିଟ ସଂଖ୍ୟାରେ ବୃଦ୍ଧି ହେବ, ସେହିସହିତ SEBC ପାଇଁ ପ୍ରଥମଥର ସଂରକ୍ଷିତ ସିଟ ବ୍ୟବସ୍ଥା ହେବ। ସରକାରଙ୍କ ମତରେ, ଏହି ପଦକ୍ଷେପ ଦ୍ୱାରା ସାମାଜିକ ନ୍ୟାୟ ସୁନିଶ୍ଚିତ ହେବା ସହିତ ପଛୁଆ ବର୍ଗର ଛାତ୍ରଛାତ୍ରୀମାନେ ଉଚ୍ଚଶିକ୍ଷାରେ ଅଧିକ ସୁଯୋଗ ପାଇବେ।
