ତାମିଲନାଡୁର ଭେଲ୍ଲୋର ଜିଲ୍ଲାରେ ନିର୍ମାଣାଧୀନ ଚର୍ଚ୍ଚର ଛାତ ଭୁଶୁଡ଼ି ପଡ଼ିବାରୁ ବଡ଼ ଅଘଟଣ ଘଟିଛି। ଦୁର୍ଘଟଣାରେ ମାଟି ତଳେ ଚାପି ହୋଇ ୩ ଜଣ ଶ୍ରମିକଙ୍କ ମୃତ୍ୟୁ ଘଟିଥିବା ବେଳେ ୧୧ ଜଣ ଆହତ ହୋଇଛନ୍ତି। କାଟପାଡ଼ି ନିକଟ ମଣ୍ଡି କୃଷ୍ଣପୁରମରେ ଗୁରୁବାର ରାତିରେ ଏହି ଅଘଟଣ ଘଟିଛି।
ସୂଚନା ଅନୁଯାୟୀ, ମଣ୍ଡି କୃଷ୍ଣପୁରମରେ ନିର୍ମାଣାଧୀନ ‘ଚର୍ଚ୍ଚ ଅଫ୍ ସାଉଥ୍ ଇଣ୍ଡିଆ’ରେ ଛାତରେ କଂକ୍ରିଟ୍ ଢଳାଇ କାମ ଚାଲିଥିଲା। ଏହି ସମୟରେ ପ୍ରାୟ ୨୦ ଫୁଟ୍ ଉଚ୍ଚର ଷ୍ଟିଲ୍ ସ୍କାଫୋଲ୍ଡିଂ ଓ ସପୋର୍ଟ ଫ୍ରେମୱର୍କ ହଠାତ୍ ଭୁଶୁଡ଼ି ପଡ଼ିଥିଲା। ଫଳରେ ଭାରୀ କଂକ୍ରିଟ୍, ଇଟା ଓ ପଥର ତଳେ ଅନେକ ଶ୍ରମିକ ଫସିଯାଇଥିଲେ।
ଖବର ପାଇ ଅଗ୍ନିଶମ ବାହିନୀ, ପୁଲିସ ଓ ଜିଲ୍ଲା ପ୍ରଶାସନର ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ଅରକ୍କୋନମ୍ରୁ ଏନ୍ଡିଆର୍ଏଫ୍ ଟିମ୍ ମଧ୍ୟ ଘଟଣାସ୍ଥଳରେ ପହଞ୍ଚି ଭଗ୍ନାବଶେଷ ତଳେ ଫସିଥିବା ଶ୍ରମିକଙ୍କୁ ଉଦ୍ଧାର କରିଥିଲା। ତେବେ ୩ ଜଣଙ୍କୁ ମୃତ ଘୋଷଣା କରାଯାଇଛି।
୧୧ ଆହତ, ବିଭିନ୍ନ ହସ୍ପିଟାଲରେ ଚିକିତ୍ସା
ଦୁର୍ଘଟଣାରେ ଆହତ ୧୧ ଜଣ ଶ୍ରମିକଙ୍କୁ ଆମ୍ବୁଲାନ୍ସ ଯୋଗେ ଭେଲ୍ଲୋର ସରକାରୀ ମେଡିକାଲ କଲେଜ୍ ହସ୍ପିଟାଲ, କ୍ରିଷ୍ଟିଆନ୍ ମେଡିକାଲ କଲେଜ୍ ହସ୍ପିଟାଲ ଏବଂ ଆନ୍ଧ୍ରପ୍ରଦେଶର ଚିତ୍ତୂରସ୍ଥିତ ଏକ ହସ୍ପିଟାଲକୁ ନିଆଯାଇଛି। ଆହତଙ୍କ ମଧ୍ୟରୁ ଅତି କମ୍ରେ ୮ ଜଣଙ୍କ ଅବସ୍ଥା ସ୍ଥିର ଥିବା ଜଣାପଡ଼ିଛି।
ନିର୍ମାଣରେ ସୁରକ୍ଷା ତ୍ରୁଟି ଥିଲା କି?
ଘଟଣାର କାରଣ ଜାଣିବା ପାଇଁ ତଦନ୍ତ ଆରମ୍ଭ ହୋଇଛି। ଚର୍ଚ୍ଚ ନିର୍ମାଣ ପାଇଁ ଆବଶ୍ୟକ ଅନୁମତି ଓ ନିର୍ମାଣ ପରମିଟ୍ ନିଆଯାଇଥିଲା କି ନାହିଁ, ତାହା ଯାଞ୍ଚ କରାଯିବ। ଏଥିସହ ନିର୍ମାଣାଧୀନ ଢାଞ୍ଚା କାହିଁକି ଭୁଶୁଡ଼ିଲା ଏବଂ ସୁରକ୍ଷା ବ୍ୟବସ୍ଥାରେ କୌଣସି ଅବହେଳା ହୋଇଥିଲା କି ନାହିଁ, ସେନେଇ ପ୍ରଶାସନ ପକ୍ଷରୁ ତଦନ୍ତ କରାଯିବ।
