କେନ୍ଦ୍ରରେ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଗଠିତ ନୀତି ଆୟୋଗର ଆଦର୍ଶକୁ ଅନୁସରଣ କରି ଓଡ଼ିଶା ସରକାର ରାଜ୍ୟ ଯୋଜନା ବୋର୍ଡର ସ୍ଥାନରେ ଏସଆଇଟିଆଇ-ଓଡ଼ିଶା ଗଠନ କରିବାକୁ ଯାଉଛନ୍ତି।
ଏହି ସଂସ୍ଥା ରାଜ୍ୟ ସରକାରଙ୍କ ଏକ ଶୀର୍ଷସ୍ତରୀୟ ରଣନୈତିକ ପରାମର୍ଶଦାତା ଭାବେ କାମ କରି “ସମୃଦ୍ଧ ଓଡ଼ିଶା ୨୦୩୬” ଓ “ବିକଶିତ ଭାରତ ୨୦୪୭” ଲକ୍ଷ୍ୟ ପ୍ରାପ୍ତି ପାଇଁ ନୀତି ଗଠନ ଓ ଯୋଜନା ପ୍ରସ୍ତୁତିରେ ମାର୍ଗଦର୍ଶନ କରିବ।
ଏସଆଇଟିଆଇ-ଓଡ଼ିଶା ମୁଖ୍ୟତଃ ଅର୍ଥନୀତି, ଗ୍ରାମୀଣ ଜୀବିକା, ନିଯୁକ୍ତି, ସହରୀ ବିକାଶ, ନବସୃଜନ, ଶକ୍ତି ପରିବର୍ତ୍ତନ ଓ ପରିବେଶ ଭଳି କ୍ଷେତ୍ରରେ ସରକାରକୁ ପରାମର୍ଶ ଯୋଗାଇବ। ଏହା ମାଧ୍ୟମରେ ଆଧୁନିକ ଚିନ୍ତାଧାରା ଓ ମାପଯୋଗ୍ୟ ଫଳାଫଳ ଉପରେ ଗୁରୁତ୍ୱ ଦିଆଯିବ।
ଏହାର ପରିଚାଳନା ପରିଷଦର ଅଧ୍ୟକ୍ଷ ଭାବେ ମୁଖ୍ୟମନ୍ତ୍ରୀ ରହିବେ। ପରିଷଦରେ ଉପାଧ୍ୟକ୍ଷ, ପୂର୍ଣ୍ଣକାଳୀନ ସଦସ୍ୟ,ପଦବୀଭିତ୍ତିକ ସଦସ୍ୟ ଓ ବିଶେଷ ଆମନ୍ତ୍ରିତ ସଦସ୍ୟମାନେ ଅନ୍ତର୍ଭୁକ୍ତ ହେବେ। ପରିଷଦ ବର୍ଷକୁ କମ୍ ସେ କମ୍ ଥରେ ବୈଠକ କରି ମୁଖ୍ୟ ନୀତିଗତ ନିଷ୍ପତ୍ତି ନେବ।
ଏହି ପଦକ୍ଷେପ ମାଧ୍ୟମରେ ରାଜ୍ୟର ଯୋଜନା ପ୍ରଣାଳୀକୁ ଆଧୁନିକ ଓ ପରିଣାମମୂଳକ କରାଯାଇ ଓଡ଼ିଶାର ସମଗ୍ର ବିକାଶକୁ ଆହୁରି ଗତି ମିଳିବ ବୋଲି ଆଶା କରାଯାଉଛି।
